Shkelje flagrante në procesin e rikonstruksionit të Shkollës së Mesme “Hasan Prishtina” në Krumë, Bashkia Has. Dokumentet e siguruara nga Qendra Kombëtare e Biznesit dhe verifikimet në terren tregojnë mospërputhje serioze midis projektit të tenderuar dhe punimeve reale.
Kontrata dhe kompanitë e përfshira
- Autoritet kontraktor: Bashkia Has
- Vlera e kontratës: 94.5 milionë lekë pa TVSH
- Afati i punimeve: 12 muaj
- Zbatues: T&J Construction & Viante Construction
- Mbikëqyrës: SIRE-ALB & ZED sh.p.k.
Ekstraktet tregtare tregojnë se T&J Construction është krijuar në nëntor 2022, me kapital 100 mijë lekë dhe aktivitet të gjerë nga ndërtimi te tregtia e produkteve bujqësore. Administrator i shoqërisë është Gledi Dehima.
Themelimi i kompanisë dhe lidhjet me pushtetin lokal
Në nëntor 2022, Julian Manahasa, në atë kohë me funksione të larta drejtuese në Bashkinë Peqin, themeloi kompaninë e ndërtimit T&J Construction sh.p.k.. Akti i themelimit e tregon qartë si themelues dhe zotërues të vetëm të kuotave në momentin e krijimit.
Vetëm dy vite më vonë, Manahasa i shiti 50 % të aksioneve shtetasit Emilian Lluca, por mbeti ortak duke ruajtur ndikim mbi aktivitetin e shoqërisë.
Gjatë periudhës kur Manahasa mbante funksione publike, T&J Construction përfitoi rreth 70 mijë euro pagesa direkte nga Bashkia Peqin, sipas të dhënave zyrtare të Thesarit të Shtetit. Krahas kësaj, kompania ka marrë pjesë në tendera publikë me vlerë totale mbi 4 milionë euro.
Mekanizmi i dyshuar: tendera të drejtuar dhe nënkontraktime klienteliste
Skema e dyshuar ndjek një model tashmë të njohur:
- Tenderët kryesorë fitohen nga kompani të tjera të lidhura, të cilat më pas nënkontraktojnë T&J Construction për zbatimin e punimeve.
- Kështu, Manahasa, si zyrtar publik dhe njëkohësisht ortak në kompani, shmang ekspozimin e drejtpërdrejtë dhe kontrollin nga organet e drejtësisë.
Kjo manovër i jep mundësi kanalizimit të fondeve publike drejt interesave private, ndërsa krijon pamje formale të ligjshme.
Rasti i rikonstruksionit të Shkollës së Mesme “Hasan Prishtina”, Krume
Kjo strategji dyshohet se është ndjekur edhe në veri të vendit.
Në Bashkinë Has, tenderi për rikonstruksionin e Shkollës së Mesme “Hasan Prishtina” në Krume, me vlerë 94.5 milionë lekë pa TVSH, u fitua nga konsorciumi T&J Construction & Viante Construction.
Ndërkohë, kompania mbikëqyrëse SIRE-ALB është themeluar në shkurt 2023, me administrator Renaldo Karaj, po ashtu me kapital minimal dhe një objekt aktiviteti tepër të gjerë – nga restaurime e deri te shërbime energjetike.
Gjetjet në terren
Pas konsultimit me një instruktor ndërtimi dhe krahasimit me preventivin e tenderit, janë konstatuar këto mospërputhje:
- Çatia: Sipas dokumenteve, duhej zëvendësuar tërësisht. Në realitet janë hequr vetëm ristelat e vjetra dhe janë vendosur tjegulla, ku një pjesë janë të vjetra, thjesht të larë e të lyer, dhe vetëm pak të reja.
- Suvatimi: Parashikohej prishje dhe suvatim i ri. Në fakt, suvatimi i vjetër nuk është prishur dhe nuk është aplikuar shtresë e re.
- Dyshemeja: Preventivi kërkonte nivelim me lluster cimento. Punimi nuk është realizuar sipas planit, dyshemeja mbeti e pa niveluar.
- Polisteroli: Materiali i instaluar është polisterol i bardhë, jo sipas specifikimeve teknike të tenderit.
Faktet tregojnë se punimet nuk përputhen me projektin e miratuar. /Publik.al/
