Një seancë e tensionuar dhe e shkurtër u zhvillua sot në Kuvend, ku programi qeverisës “Rama 4” dhe kabineti i ri qeveritar u miratuan brenda pak minutash me 82 votat e mazhorancës. Ky votim i shpejtë erdhi pas një përplasje mes mazhorancës dhe opozitës.
Ngjarja kulminante e tensionit ishte momenti kur kryeministri Edi Rama, pas prezantimit të programit, ia dha fjalën ministres virtuale “Diella”, përmes njëmesazhi me video. Kjo lëvizje u kundërshtua ashpër nga deputetët e opozitës, të cilët e konsideruan “Diellën” si antikushtetuese.
Pas dy paralajmërimeve se do të kalonin menjëherë në votim nëse nuk lejohej debati, mazhoranca e Partisë Socialiste e miratoi programin, duke i dhënë fund në një kohë rekord seancës që ishte planifikuar të zgjaste deri në orët e mbrëmjes.
Pas seancës, kryetari i PD, Sali Berisha, reagoi ashpër, duke e quajtur Ramën “kryehorr të kombit”. Në deklaratën e tij, Berisha e krahasoi veprimin e Ramës me diktatorin korean Kim Jong-Un dhe presidentin venezuelian Maduro.
“As Maduro nuk guxonte të poshtëronte në këtë shkallë parlamentin,” tha Berisha, duke theksuar se ky ishte një akt “tipik prej Kim Jong-Uni.” Ai e quajti ngjarjen “dhunë ekstreme ndaj qytetarëve shqiptarë” dhe bëri thirrje për një mision “për të çliruar shqiptarët dhe Shqipërinë”.
