Në qershor të vitit 2021, Policia e Tiranës njoftoi arrestimin e biznesmenit Arben Kacos, i cili ishte dënuar me 4 vjet burgim për “fshehje të të ardhurave” (evazion fiskal).
Rasti i pronarit të kompanisë “Kontinental” me seli në Korçë, i cili mund të përbënte një rutinë të thjeshtë policore, rikthehet në vëmendje tashmë që djali i tij, vetëm 24 vjeç, rezulton aksioner në një kompani që po ndërton një kompleks rezidencial miliona euro në zonën e Farkës, shumë pranë një qendre të rëndësishme tregtare.
I biri i Arbenit, Flavjo Kacos, i datëlindjes 1994, është ortak në kompaninë “Unit Power”. Në krah të tij është 36-vjeçari Aleks Male.
Projekti luksoz mban firmën e studios arkitekturore “Unit Studio” të Aleks Males dhe “Son Engineering”, në pronësi të Erind Bejleri, ky i fundit i njohur për lidhjet e forta me ish-bashkëpunëtorë të ngushtë të kryebashkiakut të arrestuar të Tiranës, Erion Veliaj.
Lidhjet e aksionerit Aleks Male me Bashkinë e Tiranës, e cila ka dhënë edhe lejen për kompleksin rezidencial në Tiranë, shtrihen edhe në rrafshin familjar. Të dhënat e publikuara në media tregojnë se vëllai i tij, Gjergj Male, ka punuar për shumë vite si pjesë e Inspektoratit Ndërtimor të kryeqytetit.
Aleks Male është bashkëaksioner në zyrën e projektimit “Unit Studio” me Zhivjanka Rrido, bashkëshortja farmaciste e vëllait Gjergji Male, dhe Redion Spaho, ish-punonjës i Bashkisë Tiranë.
Megjithëse të dhënat e deritanishme janë tejet periferike, ato mund të shërbejnë si një fije për të kuptuar ngritjen e befte të një kompanie, e cila, vetëm dy vjet pas krijimit të saj, arriti të fitojë një leje ndërtimi shumë të rëndësishme.
“Bosi” 24-vjeçar
Në maj të vitit 2023, Flavjo Kacos dhe Aleks Male themelojnë shoqërinë “Unit Power”, me objekt “Projektim arkitektonik dhe inxhinierik dhe ndërtim…”. Selia e saj është në rrugën “Nazmi Rashiti” në Tiranë, në pallatet e ndërtuara nga kompania “Palushi”. Adresa, ndoshta për rastësi, është në godinën e ndërtuar nga Meriman Palushi, një person i marrë i pandehur në dosjen e korrupsionit “Erion Veliaj-Ajola Xoxe”.
Administratori i kompanisë “Unit Power” është 24-vjeçari Flavjo Kacos. Në një periudhë kohore, ai ia dorëzoi stafetën e administrimit të vëllait, Xhuliano Kacos, për ta rimarrë sërish në Tetor 2024.
Vetëm pak kohë pas krijimit, “Unit Power” merr leje nga Bashkia e Tiranës për “Godinë banimi 2 dhe 3 kat, me 1 dhe 2 kat pjesërisht nën tokë, Unaza Lindore, Prane qendrës tregtare”.
Leja e ndërtimit u miratua pasi Ministri i Kulturës dhe Inovacioni, Blendi Gonxhja, në cilësinë e kryetarit të Këshillit Kombëtar të Trashëgimisë Kulturore (KKTK) kishte dhënë aprovimin për projektin.
Në vendimin nr. 477, datë 07.11.2024, Gonxhja miratoi Raportin e Vëzhgimit Arkeologjik, në kuadër të objektit “Objekte banimi 3 kat me 1 kat nëntokë”, ndodhur në Mjull-Bathore, Njësia Administrative Farkë, Njësia Strukturore FA/42, Bashkia Tiranë, me zhvillues subjekti “Unit Power” sh.p.k.”.
Vendimi i Gonxhes jep detajin se shoqëria “Unit Power” do të ndërtojë “objekte banimi”, pra, në shumës.
Flavjo Kacos, i lindur në Vreshtas të Korçës, krahas faktit që është djalë i Arben Kacos, rezulton edhe aksioner me nënën e tij, Marjeta Osmani, në shoqërinë “Alba Power”, me objekt mbledhje dhe riciklim objektet metalike. Shoqëria është krijuar në vitin 2018 nga nëna e tij, si edhe vëllai më i madh, Xhuljano Osmani.
Në vitin 2019, Flavjo Kacos blen një pjesë të aksioneve nga vëllai I tij, për shumën 50 mijë lekë të reja. Aktualisht, “Alba Power” është ç’regjistruar pa likujdim, pasi u përthith nga “Xh.F.Kacos” shpk, po në pronësi të familjes.
Projektuesi, mik me “Lalin”
Projekti i viletave në Farkë për “Unit Power” është hartuar nga “Son Engineering & Construction”, një studio e themeluar në vitin 2015 nga Erind Bejleri.
Arkitekti Bejleri nuk është emër i panjohur për publikun.
Disa vite më parë, në media u publikuan foto, të cilat dëshmonin se ai ishte një lidhje shumë e fortë shoqërore me zëdhënësin jetëgjatë të kryeministrit, Edi Rama, si edhe me Ditjon Baboçin, drejtorin e Përgjithshëm të Punëve Publike në Bashkinë e Tiranës në atë kohë.
