Inspektori i përgjithshëm i ushtrisë gjermane, Carsten Breuer, riafirmoi sot vendosmërinë e Gjermanisë për të mbrojtur aleatët e NATO-s në lindje gjatë një vizite në një manovër të madhe ushtarake në Lituani.
Deklaratat e tij erdhën pas një sulmi rus ndaj Ukrainës këtë javë, gjatë të cilit Polonia tha se 19 dronë rusë hynë qëllimisht në hapësirën e saj ajrore. Policia ajrore polake dhe aleatët e NATO-s ndërhynë për t’i rrëzuar, duke shënuar herën e parë që dronë rusë u eliminuan mbi territorin e NATO-s.
“Shkelja e fundit e hapësirës ajrore polake nga Rusia tregoi edhe një herë sa i rëndësishëm është angazhimi ynë. Ne jemi të gatshëm të mbrojmë çdo pëllëmbë të territorit të aleancës”, tha Breuer.
Qeveria gjermane njoftoi dje se Bundeswehri do të “zgjasë dhe zgjerojë” patrullimet ajrore mbi Poloni, si pjesë e përpjekjeve europiane për të forcuar sigurinë e krahut lindor të NATO-s.
Breuer theksoi se stërvitja gjermane “Quadriga 2025” në rajonin e Baltikut përfshin skenarë për mbështetje logjistike në rast konflikti, manovra e parë e këtij lloji e zhvilluar në këtë nivel.
