Erogen Vaso, 43-vjeçari që mbeti i plagosur në atentatin e ndodhur dy ditë më parë në Shkodër, është marrë sërish në pyetje nga autoritetet hetimore.
Ai dyshohet të ketë qenë shënjestra kryesore e sulmit të armatosur, i cili u krye nga Ragip Gila dhe që shkaktoi dy viktima dhe dy të plagosur.
Në dëshminë e tij, Vaso ka treguar se në momentin e ngjarjes ndodhej duke pirë kafenë e mëngjesit, kur ka vënë re një person me skafandër në kokë dhe armë në dorë.
“Në atë moment u ngrita dhe u largova me vrap,” ka deklaruar ai.
Më tej, Vaso ka rrëfyer se autori e ka ndjekur duke e qëlluar me armë, ndërsa ka mohuar të ketë njohje apo konflikte të mëparshme me Gilën.
I pyetur për lidhjet e tij me fisin Bajri, 43-vjeçari ka pranuar se ka miqësi me disa prej tyre, por ka theksuar se nuk është i përfshirë në asnjë aktivitet kriminal.
Hetimet mbi masakrën e rëndë në Shkodër, ku mbetën të vrarë dy persona dhe të plagosur dy të tjerë, mes tyre edhe Vaso, vijojnë në disa pista.
