Policia e Durrësit ka dalë me një komunikatë shtesë për mediat, ku ka njoftuar arrestimin e dy personave, në lidhje me sherrin e regjistruar mes dy familjeve mesditën e të dielës në lagjen e Spitallës në qytetin bregdetar, ku degradoi deri në përdorimin e thikave dhe sendeve të forta.
Raportohet se në sherr janë përfshirë dy çifte babë e bir, më konkretisht shtetasit M. Dubraku, 47 vjeç dhe Aldo Dubraku, 23 vjeç, nga njëra anë, si dhe A. Elezi, 46 vjeç dhe Rodriko Elezi, 22 vjeç, nga ana tjetër.
Në pranga është vënë shtetasi Rodriko Elezi, 22 vjeç, banues në Durrës, ai akuzuar për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”, pasi dyshohet se ka plagosur me thikë shtetasin M. Dubraku.
Po ashtu, në pranga është vënë shtetasi Aldo Dubraku, i akuzuar për veprën penale “Plagosja e rëndë me dashje”, pasi dyshohet se ka dhunuar me grushte shtetasin A. Elezin.
“Dyshohet se Rodriko Elezi, ka goditur me thikë shtetasin M. D., duke i shkaktuar plagë të rënda, ndërsa Aldo Dubraku ka sulmuar me grushte shtetasin A. E., duke i shkaktuar dëmtime në fytyrë. Të dy të plagosurit ndodhen aktualisht në spital, nën kujdesin e mjekëve.” raporton Poolicia.
