Blerim Shera meqenëse ka tri dosje në SPAK, nuk shqetësohet se po bëhen 4 apo më shumë çështje të hapura! Kështu mund ta shpjegojmë pse kryetari i Bashkisë Vorë vazhdon të organizojë tendera korruptivë me paratë publike. Tenderi i fundit i urdhëruar prej Sherës është zhvilluar vetëm për të kopsitur letrat, sepse pazari ka qenë bërë qysh më parë me biznesmenin Asllan Hastoçi.
Fjala është për prokurimin me objekt “Rikonstruksionin e Rrugës “Alvora”, Bashkia Vorë”. Fondi limit i financuar nga Buxheti i Bashkisë është 43 188 079,00 lekë pa TVSH që shkojnë në arkën e kompanisë “Hastoçi” shpk. Për më tepër, ko kompani është raportuar nga KLSH për mashtrim në zbatimin e kontratave publike.
Tenderi i njoftuar më 7 gusht 2025 dhe i mbyllur për dy javë, është shënuar me “Flamur të kuq” që është shenja e riskut të korrupsionit, sipas Open Data Albania.
“Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”, këtë përshkrim ka bërë Open Data Albania.
Në fakt tenderi është më i komplikuar se kaq. Për t’ia bërë punën të lehtë komisionit të Sherës, kompania e Asllan Hastoçit ka konkurruar përballë një mikut të tij. Firma “BE-IS” shpk është në pronësinë e oligarkut të ndërtimit Hamz Islamaj. Të dy biznesmenët janë partnerë në tendera dhe futen në gara si bashkim operatorësh.
Për këtë ju sjellim si shembull tenderin me objekt “Ndërtimi i Rrjetit të Jashtëm të Ujësjellësit Këlcyrë” ku dy kompanitë janë futur bashkë dhe kanë fituar kontratën publike 1.5 miliardë lekë. Edhe ky tender është shënuar me “Flamur të kuq” për shkeljet e kryera.
Roli i partnerit në këtë tender është thjesht të jetë prezent. “BE-IS” shpk ka bërë një ofertë “anomalisht të ulët”, duke i lënë rrugën e hapur Asllan Hastoçit.
Pa humbur kohë, Blerim Shera ka urdhëruar sekretarin e tij që të shpallë fituesin më 3 shtator 2025, duke i vënë vulën këtij pazari me paratë e bashkisë.
Hastoçi fiton pa plotësuar kriteret e tenderit
Një pyetje e kemi gati për kryetarin e bashkisë Vorë. A e verifikoi bashkë me komisionin e tij, nëse kjo kompani është e angazhuar në kontrata të tjera njëkohësisht?
“Hastoçi” shpk rezulton e mbytur me punë publike, duke mos përmbush kriterin teknik për mjetet dhe personelin.
Më konkretisht, “Hastoçi” është ngarkuar nga Drejtoria e Shërbimeve Qeveritare me kontratën me objekt, “Zbatimi i projektit: Rivitalizimi i Rezidencës Qeveritare, Vila Dajt”, me fond limit 619.786.829,32 pa TVSH, që është regjistruar në protokoll në datën 2 korrik 2025.
Tenderi “sekret” i organizuar nga Dhurata Frashëri e Shërbimeve e detyron Hastoçin të angazhojë mjetet dhe punonjësit për 27 muaj në këto punime.
Por nuk është vetëm kjo kontratë. Drejtori i Fondit Shqiptar të Zhvillimit, Dritan Agolli (i besuar i Ramës ashtu si edhe Dhurata) ka firmosur një tender të majmë për Asllan Hastoçin, vetëm një ditë pasi u mor në pyetje në SPAK për korrupsionin me fondet e prokuruara. Për lyerje fasadash nëpër fshatra, Hastoçit do t’i xhirohen 4.22 miliardë lekë në një tender të hartuar dhe të qepur me porosi.
Megjithëse formalisht tenderi u zhvillua në nëntor 2024, Agolli e ka mbajtur dosjen në sirtar dhe e ka dërguar në Agjencinë e Prokurimit Publik (APP) tre muaj më pas.
Më 11 shkurt 2025 Agolli ka firmosur kontratë me “Hastoçi” shpk me vlerë 422,292,719 lekë përfshirë TVSH. Kjo ishte finalja e tenderit “Rigjenerimi Urban në zona periferike dhe informale dhe në fshatra me popullsi të dendur, etj. Rajonet 3&4” Fondi limit që ishte caktuar nga komisioni i tenderit ishte 416,666,666.67 lekë pa TVSH dhe është buxhet i planifikuar për Programin “100 Fshatrat”.
Pavarësisht këtyre fakteve, kryetari Shera nuk e ka shqetësim se rrugët bëhen pa cilësi apo me vonesë, nuk e ka problem as shpërdorimin e parave të bashkisë Vorë!
