Policia e Tiranës ka bërë të mundur arrestimin e një 34-vjeçari, i cili dyshohet se ka djegur qëllimisht një automjet në pronësi të një 43-vjeçareje, në rrugën “Frang Bardhi”. Ngjarja ndodhi mbrëmjen e 3 shtatorit, rreth orës 23:50.
Në kuadër të operacionit të koduar “The Arsonist”, shërbimet e Komisariatit të Policisë Nr. 2 bënë të mundur identifikimin dhe prangosjen e shtetasit D. B., banues në Tiranë, i cili dyshohet se e ka kryer këtë akt për motive të dobëta.
Sipas njoftimit zyrtar, menjëherë pas marrjes së informacionit për zjarrin që përfshiu automjetin tip “Citroen”, u organizuan veprimet hetimore për të dokumentuar ngjarjen dhe për të çuar përpara drejtësisë autorin.
Materialet i janë referuar tashmë Prokurorisë për veprime të mëtejshme, për veprën penale “Shkatërrimi i pronës me zjarr”.
