Shtetet e Bashkuara kanë ndërmarrë një sulm të konsideruar si vdekjeprurës ndaj një anijeje që, sipas tyre, ishte e ngarkuar me drogë dhe kishte nisur udhëtimin nga Venezuela, tha sot në X sekretari amerikan i Shtetit, Marco Rubio.
”Anija po operohej nga një organizatë e shpallur si narko-terroriste”, pretendoi Rubio.
Pak para kësaj, presidenti amerikan Donald Trump kishte njoftuar në një konferencë për shtyp, pa dhënë detaje të hollësishme, se SHBA kishte ndërmarrë veprime kundër një anijeje që transportonte drogë.
Kohët e fundit, tensionet mes dy vendeve janë rritur.
Sipas mediave, SHBA ka vendosur disa anije luftarake jashtë brigjeve të Karaibeve të Venezuelës, duke thënë se veprimi synon të ndalojë kontrabandën e drogës.
Gjithashtu, Uashingtoni ka dyfishuar shpërblimin për informacion që çon në arrestimin e presidentit venezuelas Nicolas Maduro, deri në 50 milionë dollarë.
Departamenti i Drejtësisë i SHBA-së thotë se Maduro është i përfshirë në trafik ndërkombëtar droge.
