Janë zbardhur detaje të reja nga arrestimi i ish-drejtorit të SHISH, Aleksandër Shulla, në Berat. Investigimi zbuloi se ai posedonte të dhëna të klasifikuara në mënyrë të jashtëligjshme.
Sipas gazetares së TopChannel Anila Hoxha, Shulla kishte kopjuar në një USB të dhëna që përfshinin informacion mbi automjetet, sistemin e gjendjes civile të vitit 2008, si dhe të dhëna për policinë kriminale dhe departamentin e hetimit kundër krimeve të rënda.
Hetimet nisën pas kontrollit të lojërave të fatit të të birit, Pandeli Shulla, ku u zbuluan edhe biseda mes tij dhe personave të tjerë që flisnin për bixhoz dhe drogë. Në një nga bisedat, djali i ish-drejtorit i thotë një bashkëbiseduesi: “Punon plaku në SHIK, është drejtor jo në terren”, duke iu referuar të atit.
Ish-kreu i SHISH në Berat Aleksander Shulla dhe djali i tij Pandeli Shulla janë marrë nën hetim nga Prokuroria e Beratit, pasi akuzohen për tre veprat penale ‘Organizimi ose ushtrimi i veprimtarive të lojërave të fatit në kundërshtim me ligjin’, ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Tregimi i sekretit shtetëror nga personi që i është besuar’.
Prokuroria bën me dije se në lokalin e djalit të ish-kreut të SHISH Berat, u konstatua zhvilloheshin lojëra fati, u konstatuan kompjuterat e markave të ndryshme, të ndezura dhe në ekrane shfaqen lojrat online të ngjashme me ato të Adex Casino.
“Sipas Prokurorisë pranë Gjykatës së Shkallës së Parë të Juridiksionit të Përgjithshëm, Berat, nga hetimet mbi procedimin penal nr.370 të vitit 2023, pas informacioneve se në një ambient në lagjen ’30 Vjetori’ në një lokal që drejtohej nga shtetasi P.Sh., po zhvilloheshin lojëra fati, u konstatuan kompjuterat e markave të ndryshme, të ndezura dhe në ekrane shfaqen lojrat online të ngjashme me ato të Adex Casino.
Nga verifikimi teknik, u provua se nëpërmjet një aplikacioni apo softëare të instaluar në këto paisje elektronike, duke u lidhur në internet, realizoheshin lojëra fati online”, thuhet në njoftimin e Prokurorisë.
