Kompania Alko Impex, dega në Shqipëri që ka si pronar Arbën Abazin, kryeson deri më tani garën për të ndërtuar kullat te trualli i Pallatit të Sportit “Asllan Rusi”. Sipas një dokumenti, Korporata e Investimeve Shqiptarë ka nxjerrë listën e firmave që morën pjesë në konkurs, ku vendin e parë e mban bashkimi i disa firmave që kryesohet nga Alko.
Më shumë sesa meritokracia e pronarit Arbër Abazi, pikëzimi i Korporatës mund të jetë një shpagim për ish-deputetin Sadri Abazi. Por, ka dyshime se qeveria po i jep një projekt madhor edhe ortakut të familjes Ademi në Kosovë, e cila ditët e fundit është përfshirë në skandalin e aksioneve të Areoportit të Vlorës.
Kompania Alko Impex, dega në Shqipëri, është kompani e lidhur me një tjetër firmë mëmë në Kosovë me të njëjtin emër, në pronësi të Imer Ademit. Djali i këtij të fundit, Valon Ademi, është pronar i firmës 2A Group, e cila ishte ndërtuese dhe aksionere në Areoportin e Vlorës.
Por, prej vitit 2013 kur Arbër Abazi mori aksionet nga Tabir Hysa, familja Ademi e ka nipin e ish-deputetit si një njeri të besuar. Madje i kanë “dhënë emrin” firmës, teksa e kanë emëruar Arbërin edhe si administrator i kompanisë në Shqipëri.
Për koincidencë ose jo, Alko Impex, u ngrit në hierarkinë e firmave të ndërtimit pas vitit 2013, kohë në të cilën në pushtet erdhi Partia Socialiste. Xhaxhai i tij, Sadri Abazi, ka qenë deputet në disa legjislatura, teksa firma Alko merrte miliona euro nga tenderët e ndërtimit.
Koha ka kaluar dhe Arbër Abazi, me idhje të forta në politikë por edhe nga pas familjen Ademi në Kosovë, vijon të fitojë tendera. Së fundmi, ai është renditur i pari për të marrë një supër truall në një nga zonat më te preferuara të Tiranës.
Sipas dokumenteve, Korporata e Investimeve Shqiptare, ka nxjerrë pikëzimin e investimit “rijetëzimi i Pallatit të Lojërave me dorë ‘Asllan Rusi’, Tiranë”.
“Projekt-idetë paraprake arkitekturore të dorëzuara nga të gjithë aplikantët në fazën e parë të procedurës u vlerësuan dhe renditën sipas listës së mëposhtme” thuhet në dokument. Kompania e parë në listë është “Alko Impex Construction”, e cila është kryesuese në një bashkim operatorësh të tjerë si “Kengo Kuma & Associates + Seiichi Saito + Buro Happold + Ida Vako + Dhimiter Papa + Ergys Krisiko”.
Firma e dytë e listuar është “Trema Tech”, për të vijuar me të tretën që u rendit një BOE me në krye firmën “BAMI Holding”. Lista vijon me “BE-IS” e 4-ta dhe pas saj janë dy firma me pikë të njëjta “PROGEEN” dhe “TABI Construction”.
E gjashta është projekti i firmave të kryesuara nga “Ales Construction”, e 7-ta është BOE me në krye “2T”, e teta “Atelier Alter Architects PLLC” dhe e nënta është “Artan Dumi PF” etj.
“Sipas procedurës së përcaktuar, aplikantët e renditur në 5 vendet e para në procesin e vlerësimit të projekt-ideve paraprake arkitekturore, sipas renditjes së mësipërme, kualifikohen për të vijuar fazën e dytë të procedurës konkurruese” shkruan Korporata.
Dhe, pas kalimit të afateve të ankimimit, Korporata do t’u dërgojë kandidatëve të kualifikuar ftesën për propozim, e cila përmban udhëzimet për kandidatët për ndjekjen e procedurës në fazën e dytë.
Në dokumentet shoqëruese, Korporata e Investimeve Shqiptare, synon rijetëzimin e Pallatit të Sporteve “Asllan Rusi”. Zona e konkursit është brenda pjesës së vijëzuar dhe përfshin ndërtesën aktuale të sporteve, por edhe pjesën e parkingut publik në pjesën ballore dhe parkingun që ka shërbyer për autobusët në pjesën pas tij.
Sipas dokumentit përreth zonës së konkursit, ndodhen disa territore të tjera të cilat janë planifikuar që të rizhvillohen me funksione mikse dhe t’i nënshtrohen një procesi përmirësimi urban.
“Arena duhet të ketë një kapacitet të certifikuar prej 6,000 spektatorësh. Sipërfaqja totale bruto e ndërtimit e vlerësuar është rreth 13,500 m², mbi tokë, pa përfshirë hapësirat e jashtme, si parkimet dhe sheshet”, thotë Korporata. Projekti parashikon një zhvillim me përdorim të përzier, kulla shumë funksionale me një sipërfaqe totale ndërtimi prej rreth 26,500 m², pa përfshirë parkimin.
/Vox News/
