Aktori i njohur, Naun Shundi është ndarë nga jeta në moshën 66-vjeçare, pasi prej disa kohësh vuante nga një sëmundje e rëndë.
Një ditë më parë, gruaja e aktorit me anë të një postimi në Facebook, falënderonte të gjithë ata që kane kontribuar financiarisht, ndërsa kërkonte që të mos kontribuonin më pasi shëndeti i tij ishte përkeqësuar, duke marrë një tjetër drejtim.
“Në ditë të keqe, u shfaqën njerëz të mrekullueshëm, që na ndihmuan në këtë situatë të vështirë për shëndetin e aktorit regjisorit dramaturgut Naun Shundit. Ç’do emër që ka kontrubuar në llogaritë tona të hapura, që kjo ëndërr e keqe, të mbetej vetëm një ëndërr, ka jo vetëm mirënjohjen, por mbi të gjitha,na keni falur lehtësi dhe kurajo në betejen me jetën. Miq, dashamirës, koleg, artëdashës. Mos kontribuoni më në këto faqe. Tashmë, fatkeqësisht, shëndeti i Shundit ka marrë një kthesë aspak optimale.
Mirënjohje dhe shëndet në familjet tuaja”, shkroi nje dite me pare gruaja e aktorit.
Shundi ka kaluar mbi 46 vite në Teatrin Kombëtar shqiptar dhe është konsideruar një nga figurat kryesore të skenës shqiptare. Ai ka interpretuar mbi 100 role në teatër dhe rreth 20 role në film, duke kontribuar në pasurimin e dramaturgjisë shqiptare dhe duke u bërë mentor për shumë artistë të rinj.
Ai gjithashtu ka themeluar Teatrin e parë privat në Shqipëri, “Zonja e Bujtinës”, një platformë për shfaqje eksperimentale dhe promovim të talenteve të rinj. Në vitin 2021 nisi projektin “Il commissario daltonico a teatro”, një shfaqje që kombinonte humor, mister dhe absurditet, por projekti u pezullua për shkak të problemeve shëndetësore.
