Kievi është përballur me bombardime të rënda ruse gjatë natës, me dy fëmijë midis katër personave të vrarë, thanë zyrtarët ukrainas herët të enjten.
Kryebashkiaku Vitali Klitschko tha se sulmi me dronë dhe raketa në kryeqytetin e Ukrainës ishte “masiv”, me zyrtarë ushtarakë që konfirmuan në Telegram se të paktën 30 persona ishin plagosur.
Një ndërtesë pesëkatëshe u shemb në distriktin Darnytski dhe një zjarr u raportua gjithashtu në një ndërtesë banimi shumëkatëshe në distriktin fqinj Dnipro.
Vala e raketave vjen pasi më shumë se 100,000 shtëpi ukrainase mbetën pa energji elektrike nga sulmet e fundit me dronë rusë ndaj infrastrukturës energjetike, tha të mërkurën Presidenti i Ukrainës, Volodymyr Zelensky
Në një postim në Telegram, Tymur Tkachenko, kreu i administratës ushtarake të Kievit, tha se një nga fëmijët që u vra ishte një vajzë 14-vjeçare. Të paktën pesë fëmijë ishin plagosur në sulmet e fundit me dronë. Tre persona u nxorën të gjallë nga rrënojat dhe ka shumë mundësi që të ketë ende njerëz nën rrënoja.
Ai vuri në dukje se më shumë se 20 lagje ishin shënjestruar, me shumë ndërtesa, përfshirë një çerdhe që u përfshi nga flakët.
Ministri i Brendshëm ukrainas Ihor Klymenko njoftoi në Telegram se afërsisht 500 ekipe shpëtimi dhe 1,000 oficerë policie po punojnë njëkohësisht në Kiev.
“Në operacionin e shëptimit janë përfshirë alpinistë, kujdestarë qensh, psikologë, inxhinierë, zjarrfikës dhe personel shpëtimi. Pajisjet robotike po përdoren në mënyrë aktive për të pastruar zonën në mënyrë që ekipet e shpëtimit të mund të punojnë më shpejt. Çdo minutë e punës së shërbimeve tona të emergjencës ka për qëllim shpëtimin e jetëve dhe mbështetjen e atyre që kanë vuajtur më shumë nga terrori rus. Janë gjetur edhe fragmente trupash, por identifikimi është ende i vështirë “, shkroi ai.
Tre vjet e gjysmë pas pushtimit në shkallë të plotë të Ukrainës nga Rusia, luftimet në terren nuk tregojnë shenja qetësimi.
Ndërkohë në orën 5:30 të mëngjesit të sotëm, një shpërthim u dëgjua në Zaporizhia pasi forcat ruse sulmuan një nga objektet industriale të qytetit, duke shkaktuar një zjarr. Agjencia e lajmeve Ukrinform raportoi këtë, duke cituar kreun e administratës ushtarake rajonale, Ivan Fedorov, në Telegram.
“Rusët sulmuan një nga bizneset e qytetit. Një zjarr shpërtheu si pasojë e sulmit”, shkroi ai. Aktualisht nuk ka raportime për viktima.
Ndërsa mbrëmë, trupat ruse kryen një sulm të synuar ndaj mjeteve të transportit civil të pasagjerëve. Në veçanti, u sulmua flota e trenave me shpejtësi të lartë Intercity+ .
“Falë veprimit të koordinuar të punonjësve të hekurudhave, zjarri në objekt u shua. Një tren u dëmtua rëndë. Punëtorët ishin të sigurt në strehimore përpara kohe. Po bëjmë gjithçka që është e mundur, për të siguruar që numri maksimal i trenave të mund të qarkullojë. Asnjë tren nuk do të anulohet: për këtë arsye, po vendosim mjete zëvendësuese të transportit”, raportoi në Telegram Ukrzaliznytsia, kompania që menaxhon rrjetin hekurudhor të Ukrainës.
