Deputeti i Partisë Demokratike, Gazment Bardhi, ka denoncuar një tjetër shkelje të rëndë gjatë procesit të votimit në zgjedhjet e 11 majit.
Në një postim në Facebook, Bardhi e quan këtë episod “Votim i kontrolluar = farsë elektorale” dhe akuzon se zgjedhjet nuk ishin as të lira dhe as të barabarta.
Ai shprehet se shteti është shkri me partinë në pushtet, e cila sipas tij, njëlloj si “një bandë terroriste”, ka cenuar lirinë e qytetarëve për të votuar në fshehtësi dhe pa kontroll. Sipas Bardhit, pamjet zyrtare të KQZ-së tregojnë sesi në QV 1813, njësia administrative Dushk, Bashkia Lushnje, patronazhistët e PS kontrolluan votimin e qytetarëve.
Deputeti akuzon Belinda Ballukun si urdhëruesen e kësaj skeme, duke pretenduar se vetëm përmes metodave mafioze mund të kontrollohej çdo votë e blerë me para korrupsioni. Bardhi thekson se qytetarët presin ndëshkimin e atyre që ai i quan “terroristë elektoral” dhe fton organet e drejtësisë që të veprojnë ndaj krimit elektoral pa mbyllur sytë.
Postimi i plotë
Episodi 5/ VOTIM I KONTROLLUAR = FARSË ELEKTORALE
Neni 1 i Kushtetutës së Shqipërisë përcakton se “qeverisja bazohet në një sistem zgjedhjesh të lira dhe të barabarta”. Zgjedhjet e 11 Majit nuk ishin as të lira dhe as të barabarta.
Jo vetëm që shteti u shkri me partinë në pushtet, por kjo e fundit njëlloj si një bandë terroriste cenoi hapur lirinë e zgjedhësve për të votuar në fshehtësi dhe të pa kontrolluar.
Pamjet zyrtare të KQZ provojnë sesi në QV 1813, njësia administrative Dushk, Bashkia Lushnje, patronazhistët e PS kontrolluan votimin e qytetarëve ditën e zgjedhjeve, duke dhunuar lirinë e tyre për të votuar të pa kontrolluar.
Belinda Balluku urdhëruesja e kësaj skeme të shtrirë në të gjitha QV që kanë pamje me videokamera, e kishte të qartë se vetëm përmes skemave mafioze mund të kontrollonte çdo votë të blerë me para korrupsioni. Qytetarët presin ndëshkimin e terroristëve elektoral, dhe është detyrë e organeve të drejtësisë që të mos mbyllin sytë përpara krimit elektoral.
