Një procedurë tenderimi e zhvilluar nga Universiteti i Tiranës për “Rinovimin dhe modernizimin e infrastrukturës teknologjike në ndihmë të kërkimit shkencor” në filialin e tij në Sarandë ka ngritur pikëpyetje serioze mbi transparencën dhe konkurrencën reale.
Fitues i procedurës është shpallur kompania PC Store, me një ofertë prej 2,708,215 lekësh, saktësisht e barabartë me fondin limit të përcaktuar nga vetë universiteti.
Kur oferta përputhet fiks me fondin limit
Në praktikën e prokurimeve publike, një ofertë që përputhet në çdo qindarkë me fondin limit është një sinjal alarmi i fortë për mungesë gare të vërtetë. Kjo përputhje “perfekte” lë të kuptohet se operatori ekonomik ka pasur dijeni të plotë për shumën maksimale të lejuar dhe e ka ofruar atë, duke eliminuar mundësinë e një uljeje reale të kostos për buxhetin publik.
Sipas të dhënave zyrtare, procedura ishte e hapur, e thjeshtuar, me afate të shkurtra:
- Data e hapjes: 16 korrik 2025
- Data e mbylljes: 28 korrik 2025
- Data e publikimit të fituesit: 5 gusht 2025
Emrat pas tenderit
Kjo procedurë mban vulën e drejtuesve më të lartë të Universitetit të Tiranës:
Artan Hoxha, rektor i UT, i përfolur prej vitesh në media për afera klienteliste dhe vendimmarrje të dyshimta financiare.
Skerdi Dafa, administrator i UT, i akuzuar më herët nga zëra publikë për menaxhimin e tenderëve në mënyrë të mbyllur dhe në favor të kompanive të caktuara.
Të dy kanë qenë subjekt i akuzave për korrupsion dhe shpërdorim të fondeve publike, veçanërisht në kontrata që lidhen me blerje pajisjesh dhe investime infrastrukturore brenda universitetit.
PC Store dhe tenderat publikë
PC Store ka qenë në qendër të dyshimeve edhe më parë për fitimin e tenderëve të paracaktuar, veçanërisht në sektorin e pajisjeve IT dhe softuerëve, ku shpesh ka konkurruar e vetme ose me garë minimale.
PC Store modeli i tenderëve të paracaktuar
PC Store ka një histori të gjatë me tendera të dyshimtë në sektorin publik, veçanërisht në IT dhe infrastrukturë teknologjike. Një nga rastet më flagrantë është blerja e serverit për Kuvendin e Shqipërisë. Burime pranë institucioneve të prokurimit publik pohojnë se kompania jo vetëm që e kishte blerë serverin përpara hapjes së tenderit, por edhe e kishte në gjendje fizike në magazinat e saj, duke e konsideruar veten fituese pa u zhvilluar ende procedura zyrtare.
Nga ana tjetër, Komisioni i Prokurimit Publik (KPP) nuk ka bërë publik ende vendimin për këtë tender, duke shtuar dyshimet për paracaktim dhe mungesë transparence. Ky precedent e bën edhe më të fortë dyshimin se tenderi i Universitetit të Tiranës ndjek të njëjtin model – shpalljen fitues të një kompanie që di paraprakisht rezultatin.
Burime për Publik.al konfirmojnë se serveri është i veçanté dhe shumë i kushtueshën dhe ka hyrë në Shqipëri shumë muaj përpara se të shpallej tenderi i Kuvendit. Server shume i kushtueshem per AI.
Dyshimet e forta mbi procesin
Tre elementë kyç e bëjnë këtë procedurë problematike:
- Oferta identike me fondin limit – shenjë klasike e një gare formale pa ulje çmimi.
- Afatet e shkurtra – vetëm 12 ditë nga hapja deri në mbylljen e ofertave, duke kufizuar pjesëmarrjen reale.
- Mungesa e transparencës mbi numrin e ofertuesve dhe arsyet e skualifikimit – informacion që nuk publikohet në mënyrë të plotë.
Thirrje për hetim
Ky rast kërkon ndërhyrje urgjente nga SPAK, Agjencia e Prokurimeve Publike dhe Kontrolli i Lartë i Shtetit. Një procedurë ku fituesi merr pikërisht fondin maksimal, nën drejtimin e zyrtarëve të përfolur për korrupsion, nuk mund të quhet garë e ndershme.
Publik.al do të vijojë të ndjekë gjurmët e këtij tenderi dhe të hetojë nëse kemi të bëjmë me një tjetër rast ku buxheti publik përdoret si çek i bardhë për një kompani të favorizuar.
