Më shumë se 100 persona rezultojnë të zhdukur nga shirat e rrëmbyeshëm dhe përmbytjet që ndodhën në Indi.
Rajoni Uttarakhand në veri të vendit ishte dhe zona më e prekur nga përmbytjet. Një valë gjigante uji vërshoi nga malet në fshatin Dharali, duke përmbytur rrugë dhe ndërtesa.
Autoritetet kanë nisur operacionet e shpëtimit janë duke u zhvilluar kërkime në zonë, ndërsa shumë ekipe të tjera nuk kanë mundur të mbërrijnë ende për shkak të rrugëve të dëmtuara nga shirat e rrëmbyeshëm. Operacionet po përparojnë ngadalë pasi zona është mbuluar nga një sasi e madhe llumi dhe mbeturinash si pasojë e përmbytjeve.
Rrebeshet e shiut shkaktuan fryrjen e lumit Kheerganga, duke përmbytur dhe shkaktuar rrëshqitje dherash mbi fshatin Dharali, një destinacion i njohur turistik në verë.
Uttarakhand, i vendosur në Himalajet perëndimore, është shumë i ndjeshëm ndaj përmbytjeve të menjëhershme dhe rrëshqitjeve të dheut. Në vitin 2021, më shumë se 200 njerëz vdiqën nga përmbytjet e menjëhershme të shkaktuara nga rrebeshi i papritur i shiut.
/rtsh.al/
