Një aksion i papritur për lirimin e hapësirave publike ka nisur mëngjesin e kësaj të marte në Korçë, duke ngjallur polemika dhe reagime të forta. Punonjësit e Bashkisë, të shoqëruar nga drejtori i Kontrollit të Territorit dhe Policia Bashkiake, kanë zbarkuar në pedonalen e qytetit, duke nisur çmontimin e strukturave pa leje.
Ky aksion vjen disa ditë pas deklaratave të kryebashkiakut Sotiraq Filo, i cili njoftoi se kishte arritur një marrëveshje me pronarët e bizneseve. Sipas Filos, afati i fundit për lirimin e hapësirave ishte caktuar për 17 gusht, pas përfundimit të Festës së Birrës, me mundësinë që tendat të mbaheshin përkohësisht. Mirëpo, fillimi i aksionit sot, më 5 gusht, ka ndezur debatin dhe ka shkaktuar konfuzion.
Gjatë aksionit, drejtori i Kontrollit të Territorit u përball me këshilltarin e pavarur Lazjon Petri, i cili shkoi në mbështetje të bizneseve. Petri kërkoi një vendim zyrtar për aksionin dhe vuri në dukje se gjendja e pedonales ka qenë e tillë prej vitesh dhe se bizneset kanë qenë korrekte në pagimin e taksave.
“Pse u kujtuat kaq papritur sot kur ka vite që pedonalja ka qenë kështu?” – u shpreh Petri, duke e akuzuar Bashkinë për veprime në kundërshtim me ligjin.
Drejtori i Kontrollit të Territorit, nga ana e tij, deklaroi se aksioni do të vazhdojë dhe se çdo ankesë mund të bëhet në rrugë ligjore. Kjo përgjigje nuk qetësoi pronarët e bizneseve, të cilët ndjehen të mashtruar pas premtimit të kryebashkiakut për një afat më të gjatë.
