Një ngjarje e rëndë ka tronditur fshatin Baicë të Lipjanit. Një trup i pajetë, që dyshohet se i përket një burri të shpallur më parë si i zhdukur, është gjetur i groposur nga familjarët e tij.
Lajmin e ka konfirmuar zëdhënësja e Policisë për rajonin e Prishtinës, Flora Ahmeti, e cila bëri të ditur se rasti po hetohet si “vrasje e rëndë”.
“Dje rreth orës 12:00, në fshatin Baicë të Lipjanit, është gjetur i groposur një trup i pajetë,” tha Ahmeti. “Hetuesit policorë, në koordinim me prokurorinë, kanë nisur veprimet procedurale, ndërsa trupi është dërguar në Institutin e Mjekësisë Ligjore për autopsi dhe identifikim.”
Sipas informacioneve fillestare, trupi i pajetë është zbuluar nga familjarët e viktimës, i cili ishte shpallur i zhdukur pak ditë më parë. Edhe pse ende nuk ka një konfirmim zyrtar, dyshohet se viktima është Enver Bajraktari, për zhdukjen e të cilit familja kishte kërkuar ndihmë.
Hetuesit ndodhen në terren duke mbledhur prova, ndërsa pritet që autopsia të japë detaje më të sakta mbi shkakun e vdekjes dhe identitetin e saktë të viktimës. Zbardhja e plotë e rrethanave të kësaj ngjarjeje tragjike mbetet prioritet për organet e rendit.
