Shqipëria vijon të renditet ndër vendet me nivelin më të ulët të motorizimit në Europë. Sipas të dhënave të publikuara nga Eurostat për vitin 2024, në Shqipëri ka vetëm 328 makina për çdo 1,000 banorë, çka do të thotë se vetëm një në tre banorë zotëron një automjet.
Pavarësisht një rritjeje të lehtë të këtij treguesi, kryesisht për shkak të rishikimit të popullsisë me ulje dhe shtimit të numrit të automjeteve në 2024-n, kjo normë mbetet dukshëm më e ulët krahasuar me pjesën më të madhe të kontinentit. Për shembull, në vitin 2023, Eurostat raportonte 202 mjete për 1000 banorë, por kjo shifër ishte llogaritur bazuar në popullsinë e vjetër prej rreth 2.7 milionë banorësh, ndërsa me Censin e ri popullsia zbriti në rreth 2.4 milionë banorë.
Në rajonin e Ballkanit, Shqipëria renditet më lart se vetëm disa vende: Bosnja dhe Hercegovina (321), Maqedonia e Veriut (303) dhe Turqia, e cila ka nivelin më të ulët në Europë me vetëm 189 makina për 1,000 banorë.
Ndërkohë, Kosova ka një normë më të lartë se Shqipëria, rreth 349 makina për 1,000 banorë (sipas të dhënave të vitit 2023), ndërsa Mali i Zi qëndron ndjeshëm më lart me 417. Serbia dhe Gjeorgjia kanë gjithashtu norma më të larta, respektivisht 377 dhe 388 makina për mijë banorë.
Në Europën Qendrore dhe Lindore, vende si Rumania (444) dhe Hungaria (447) kanë nivele të krahasueshme me mesataren e rajonit, por përsëri dukshëm më të larta se Shqipëria.
Në krahun tjetër të tabelës, vendet perëndimore dhe nordike dominojnë me norma shumë më të larta motorizimi. Italia kryeson me 701 makina për 1,000 banorë, e ndjekur nga Luksemburgu, Finlanda dhe Qipro, të cilat gjithashtu kalojnë kuotën e 650 makinave për mijë banorë. Vende si Gjermania, Franca, Austria dhe Spanja kanë gjithashtu norma që variojnë ndërmjet 550 dhe 650.
Mesatarja e Bashkimit Europian për vitin 2024 qëndron në rreth 576 makina për 1,000 banorë, gati dy herë më shumë se niveli shqiptar. Ky tregues tregon jo vetëm për mundësitë ekonomike, por edhe për mënyrën e jetesës, nivelin e urbanizimit dhe zhvillimin e infrastrukturës rrugore në vend.
Ndërsa Shqipëria ka parë rritje të numrit të mjeteve në vitet e fundit, krahasuar me standardet europiane, niveli i motorizimit vijon të mbetet ndër më të ulëtit në kontinent, çka nënvizon diferencat e mëdha ekonomike dhe të zhvillimit mes vendeve.
Të dhënat e Drejtorisë së Përgjithshme të Shërbimeve të Transportit Rrugor (DPSHTRR) dhe INSTAT bëjnë të ditur se numri më i lartë i mjeteve është në Tiranë dhe Durrës, me rreth 500 makina për një mijë banorë, ose një makinë për dy banorë. Deri në qershor të vitit 2024, në vend ishin të regjistruara 914 mijë mjete, nga të cilat 738 mijë ishin autovetura.
Dy vitet e fundit, numri i mjeteve të regjistruara në vend është rritur ndjeshëm për shkak të importeve masive nga Korea e Jugut, e cila tregton mjete me çmim ekonomik. Sipas DPSHTRR, në vitin 2024 u regjistruan për herë të parë 18.8 mijë automjete me origjinë nga Korea e Jugut, duke e kthyer atë në shtetin më të madh importues, me 19% të totalit.
