Një tjetër “tregim me një firmë të vetme” vjen këtë herë nga bregdeti, pikërisht nga Bashkia Himarë! Një tender me vlerë 45 milionë lekë (me TVSH), për rikonstruksionin e rrugës Cakua, i ka dhënë një firmës që është e vetmja që mori pjesë. Kjo nuk është garë – kjo është farsë!
🔴 RedFlag!
Ky tender është flamur i kuq nga koka te këmbët. Procedurë “e hapur”, por… me vetëm një ofertues: firma e zakonshme “ALKO IMPEX CONSTRUCTION”. E njihni? Normal! Kjo firmë është “e preferuara” në shumë bashki jugore, ku gara zhvillohet me letra, por fituesi dihet që në mëngjes.
Si u luajt loja?
Objekti: Rikonstruksioni i rrugës Cakua, Loti I
Autoritet prokurues: Bashkia Himarë
Data e njoftimit: 13 dhjetor 2024
Afati i dorëzimit: 30 dhjetor 2024 (festat, askush s’ka kohë të aplikojë)
Kontrata u lidh: 26 mars 2025
Fituesi: ALKO IMPEX, me një ofertë prej 37.5 milionë lekësh pa TVSH
Operatorë pjesëmarrës në garë: Vetëm 1
Kjo nuk është rastësi, është model! Të gjithë i dimë praktikat: shpallje e papritur, dokumente që kërkojnë ditë pune në mes të festave, kushte që i përmbush vetëm një firmë “miqësore”…
SPAK, po flen apo thjesht nuk sheh?
Në fund të ditës, këto janë paratë e publikut, që ndahen si “bakshish” për firmat e preferuara. A nuk ka thënë vetë SPAK se mund të nisë hetime edhe me indicie nga mediat?
Epo ja ku është indicia:
Tender + zero garë + firmë e zakonshme fituese = Abuzim klasik!
A do të veprojë ndonjëherë SPAK për tenderat e bashkive, apo do mjaftohet me “peshq të mëdhenj” nga e kaluara, ndërkohë që ryshfeti dhe pazari vazhdojnë çdo ditë nën hundën e publikut?
Konkluzioni?
Tenderat si ky në Himarë nuk janë për zhvillim, janë për zhvatur. Çdo kilometër rrugë që ndërtohet me këto metoda është një metër më shumë drejt humbjes së besimit te shteti.
Koha për heshtje ka kaluar.
Koha për të folur me emra ka ardhur.
ALKO IMPEX, Bashkia Himarë, SPAK… jeni të gjithë në fokusin tonë!
