Përplasja publike mes Adriatik Lapajt dhe Endri Shabanit vazhdon, me këtë të fundit që ka reaguar sërish ndaj deklaratave të kreut të “Shqipëria Bëhet”.
Në reagimin e tij, Shabani e akuzon Lapajn për shpifje dhe manipulim të së vërtetës, duke e cilësuar sjelljen e tij si pjesë të një “teatri politik”. Sipas tij, Lapaj po përpiqet të dalë i pastër nga një situatë që vetë e ka krijuar, përmes një strategjie që përfshinte përdorimin e të afërmve si kandidatë “placeholder”.
Shabani thekson se nuk ka pasur asnjëherë synim ta pengojë Lapajn të hyjë në Parlament dhe se e ka mbështetur publikisht të drejtën e tij për të marrë mandatin, si dhe të kujtdo që ai zgjedh ta përfaqësojë. Megjithatë, ai thekson se nuk mund të injorojë kërcënimet që, sipas tij, janë bërë ndaj familjarëve të tij dhe që lidhen me emrin e Lapajt.
Duke komentuar rrethanat që çuan në dorëzimin e mandatit nga një i afërm i tij në favor të motrës së Lapajt, Shabani nënvizon se ka qenë një vendim vullnetar nga ana e familjarëve të tij, pa ndonjë ndikim të drejtpërdrejtë prej tij.
Në përfundim, Shabani shpreh dëshirën që ky përballje publike të përmbyllet, duke e konsideruar si një dëm të panevojshëm për besueshmërinë e politikës së re.
Reagimi i plotë i Endri Shabanit
“Një përgjigje për deklaratën e sotme të Z. Adriatik Lapaj
Në mënyrë të përsëritur dhe fatkeqësisht për turpin e “politikës së re”, jam thirrur në një duel publik me mjete të pabarabarta nga Adriatik Lapaj.
Theksoj “me mjete të pabarabarta” sepse shpifja, gënjeshtra, fabrikimi i të vërtetës janë mjete që kanë një epërsi të caktuar mbi atë që nuk di dhe nuk do që t’i përdorë.
Adriatik Lapaj po shpif ndaj meje, po gënjen për mua dhe po përpiqet të fabrikojë një të vërtetë të tijën, duke u përpjekur të dalë i larë nga një çorbë që e ka gatuar vetë.
Unë nuk kam pasur, nuk kam dhe s’kam pse apo si të kem ndonjë qëllim për të penguar Adriatikun të hyjë në Parlament.
E kam bërë të qartë publikisht dhe privatisht me të, se për mua ai, apo kushdo tjetër që ai do (përfshi Greta Ambelin apo Kleana Xhuvelin), mund të shkojë dhe të marrë mandatin.
Nga ana tjetër, ia kam bërë të qartë po ashtu Adriatikut se unë nuk e bind dot dajën tim që të harrojë kërcënimet me jetë, apo dhunën publike dhe mediatike të frymëzuar, në mos porositur, nga Adriatiku.
Përpara se të kalohej në dhunë e kërcënime, Adriatiku është dëshmitar që jam ulur bashkë me të për t’i kërkuar dajës t’i hapë rrugën, dhe nuk ia kemi dalë.
Unë nuk jam Zeqiri dhe as dua të bëj avokatin e tij, por nuk kemi argumente as unë, as Adriatiku për ta bindur që ai të mos i kërkojë hesap Adriatikut për sa i përket fjalës së dhënë.
Kur kemi folur me Zeqirin, ai na ka thënë troç që nuk është politikan dhe premtimet i merr seriozisht. Prandaj edhe e kishte besuar Adriatikun kur thoshte se do të jepte dorëheqjen nëse do të ishte deputet i vetëm.
Kështu si shkuan gjërat, sidomos pas kërcënimeve nga njerëz të partisë së Adriatikut, ai ndihet edhe më i bindur që nuk duhet të dorëzohet përballë presionit, sepse sipas tij, Adriatiku është një gënjeshtar si çdo politikan i vjetër.
Ajo që unë nuk kuptoj është përse Adriatiku kërkon të më bëjë mua përgjegjës për vendimet individuale të dikujt që, po, është i afërmi im, por ka kokën e vet, kur Adriatiku vetë nuk mban përgjegjësi as për familjarët e tij që kërcënojnë në emër të tij.
Unë besoj njësoj si Adriatiku që ai s’ka përgjegjësi për vjehrrin që nuk e kaloi Vettingun. Por nuk është problemi im nëse ai beson që përgjegjësia e dikujt tjetër është e imja – dhe kjo nuk ka ku të rrijë!
Më vjen keq që një lider i ri si Adriatiku nuk merr asnjë përgjegjësi vetë për këtë teatër politik me familjarët, të cilin na e sugjeroi si një “gjetje gjeniale”. Ky truk ekstra-ligjor kishte padyshim risk, sepse varej te vullneti i atyre që pranonin të përdoreshin si “placeholders” (mbajtës rradhe). Prandaj edhe duhej menaxhuar me shumë kujdes.
Megjithatë, do të doja që ky absurd të mbaronte. Dhe personalisht, së bashku me ata familjarë që mendojnë si unë, e kam hapur krahun pa asnjë problem.
Motra e Adriatikut po bëhet deputete sot vetëm sepse njeriu im më i afërt ka pranuar t’ia lirojë vendin asaj.
Ndërsa Adriatikut do t’i lutesha që çfarë ka me dajën, të mos ma kërkojë mua, sepse për më tepër, sado qesharake të duket, dajës tim iu lut ta përfshinte në listë në minutën e fundit, kur nuk gjente dot kandidatë për të mbushur listat.
Unë nuk kam asnjë lidhje me këtë histori.
As jam deputet dhe as dua më të bëhem deputet.
Këtë e di Adriatiku dhe e dinë të gjithë ata që duhet ta dinë, me gojë dhe me shkrim.
Prandaj, mos më tërhiqni mua në një valle që duhet të mbyllet sa më parë. Jo për mua, por për të shpëtuar sadopak nga fytyra e zhgarravitur tashmë e “politikës së re”!”, thuhet në reagimin e Shabanit.
