Inspektorati Kombëtar i Mbrojtjes së Territorit (IKMT) ka përfunduar aksionin e shembjes së ndërtimeve të banorëve vendas në zonën e mbrojtur të Thethit. Në Butrint, pranë Manastirit zonë e mbrojtur, sikurse Thethi, qeveria ka miratuar ndërtimin e një kompleksi turistik luksoz.
Denoncimi vjen nga faqja “Mbrojtjes së Trashëgimisë Kulturore” të cilët ngrenë pikëpyetje mbi standardet e dyfishta të ndjekura nga autoritetet.
Banorët e Thethit, që kanë jetuar dhe ndërtuar prej brezash në këtë zonë, pretendojnë se po përballen me masa represive dhe selektive për ndërtime që shpesh janë për qëllime banimi apo mikpritjeje tradicionale. Në të kundërt, në Butrint, një nga sitet më të rëndësishme arkeologjike dhe natyrore të vendit, është miratuar një ndërhyrje e thellë në zonën përreth Manastirit, nën emrin e “zhvillimit të turizmit elitar”.
Me të drejtë shtrojnë pyetje për Ministren e Turizmit, znj. Mirela Kumbaro:
A është projekti i ndërtimit pranë Manastirit në Butrint i ngjashëm me ndërhyrjet që janë shembur në Theth?
Nëse po, përse njëra lejohet dhe tjetra ndalohet?
Pse ndërtimet nga banorët autoktonë në një zonë të mbrojtur si Thethi konsiderohen të paligjshme, ndërkohë që ndërhyrjet e kompanive të mëdha në Butrint, gjithashtu zonë e mbrojtur, lejohen dhe përkrahen nga shteti?
Cili është standardi që përdoret për të vlerësuar nëse një ndërhyrje në zonat e mbrojtura është e pranueshme?
A ka një protokoll të njëjtë për banorët vendas dhe për investitorët e huaj apo të lidhur me qeverinë?
Çfarë i dallon realisht ndërhyrjet që bëhen nga komunitetet autoktone me mjete modeste, dhe projektet me buxhete të mëdha të investitorëve që shpesh nuk kanë lidhje historike, kulturore apo shoqërore me zonën ku ndërhyjnë?
