Famullitari i Shkodrës, Dom Vlash Palaj, ka reaguar me një mesazh të fortë në mbrojtje të banorëve të Thethit, ndaj të cilëve autoritetet kanë nisur aksione për shembjen e ndërtimeve pa leje. Gjatë Meshës së Shenjtë këtë të diel, ai dënoi ashpër mënyrën si po trajtohen qytetarët, duke e quajtur këtë situatë një padrejtësi të thellë që shkatërron jetën e njerëzve.
“Më vjen shumë keq për ata njerëz të shkretë,” tha ai në fillim të predikimit. “I joshën, i rrejtën, i blenë, i shfrytëzuan, i vjelën për nga ana monetare dhe në fund i hodhën, i tradhtuan, i dogjën, i shkatërruan, do t’i gjobisin e do t’i burgosin.”
Ai tha se qeveria ka për detyrë të dialogojë me banorët për të gjetur zgjidhje, duke kujtuar shembullin e mësimit të Krishtit për faljen dhe mirëkuptimin: “Nëse ata nuk pranojnë një herë, dy herë, atëherë, ashtu siç thotë Krishti, leçite – veçoje. Por jo të shkatërrosh, të poshtërosh dhe të burgosësh njerëzit.”
Dom Palaj kritikoi edhe klimën e përgjithshme të shoqërisë shqiptare, që sipas tij vazhdon të mbetet e ndarë nga armiqësia, mungesa e kulturës së dialogut dhe urrejtja. Ai përmendi një thënie të Faik Konicës: “E keqja më e madhe e Shqipërisë janë shqiptarët,” duke shtuar se kjo lidhet me faktin që ende nuk dimë të marrim përgjegjësi për jetën e njëri-tjetrit dhe të gjejmë rrugë të përbashkëta për zgjidhje.
Në fjalën e tij, ai u bëri thirrje autoriteteve që të mos kushtëzojnë dialogun në kohë apo në presione, por të përpiqen të kuptojnë nevojat e komuniteteve që kanë vuajtur historikisht. “Nuk është ligji mbi çdo gjë,” tha Dom Palaj. “Ligji është i nevojshëm, por mbi ligjin duhet të jetë njerëzia, dinjiteti dhe prania Hyjnore që na thotë se duhet të kemi rrugëzgjidhje më paqësore.”
Ai u ndal edhe tek emigrantët që kthehen në atdhe për pushime, duke i këshilluar të mos vizitojnë Thethin gjatë kësaj vere. “Fatkeqësisht, ju këshilloj të mos shkoni në Theth, se aty humbni qetësinë mendore dhe shpirtërore, e si pasojë edhe fizikisht nuk keni për të gjetur paqe. Nuk është faji juaj. Faji është i atyre që janë më shumë të prirur me bë keq dhe me shkatërru sesa me ndërtu.”
Në fund të Meshës, Dom Palaj u lut që populli shqiptar të lartësohet në ndërgjegjen e vet dhe të mos përsërisë gabimet e së kaluarës, ku janë derdhur gjak dhe janë shkatërruar jetë për copëza toke, ujë apo sot për “disa kabina dërrasash”.
