Edi Martini ka debutuar me humbje në krye të Vllaznisë, me shkodranët që u mposhtën minimalisht në ndeshjen e parë kualifikuese në Conference League.- Advertisement –
Një lojë e dominuar nga Vllaznia, por në fund fati i buzëqeshi skuadrës nga Letonia, Daugavpils, që mori një fitore me shumë vlerë në Elbasan.
Ndeshja e parë zyrtare nuk shkoi ashtu siç duhet për Edi Martinin, me skuadrën e tij që e pati të pamundur të merrte një rezultat pozitiv ndaj një ekipi me të cilin diferencat ishin të mëdha.
Pjesa e parë u mbyll pa gola, por me një paraqitje pozitive të shkodranëve, teksa në pjesën e dytë ritmi ishte po i njëjtë.
Nga momenti në moment pritej goli i Vllaznisë, por në minutën e 85’, miqtë nga Letonia gjetën avantazhin me Lizunovs, pas një devijimi të saktë me kokë që u ndal në rrjetën e Qarrit. 0-1 dhe Daugavpils merr një fitore me shumë vlerë për çështjen kualifikim.
Skuadra tjetër e Superligës, Partizani, nuk shkoi më shumë se një barazim përballë Nõmme Kalju në transfertë.
Të kuqtë krijuan pak raste shënimi, me kundërshtarin që diktoi lojën. Ishin vendasit që gjetën të parët avantazhin në nisje të pjesës së dytë, ku Mannilaan ndëshkoi “demat”.
Katër minuta zgjati avantazhi i estonezëve, pasi Xhuliano Skuka riktheu ekuilibrat, teksa më tej shifrat mbetën të pandryshuara 1-1 ndërsa ndeshjet e kthimit luhen më 17 korrik.
