Ministria e Mbrojtjes ka njoftuar për situatën e zjarreve në vend gjatë 24 orëve të fundit, ku janë raportuar 24 vatra zjarri në total, nga të cilat 6 prej tyre janë ende aktive në orët e para të mëngjesit të sotëm.
Vatrat e zjarrit u evidentuan në një numër të madh bashkish të vendit, duke përfshirë Elbasanin, Finiqin, Delvinën, Selenicën, Vlorën, Tiranën, Vorën, Krujën, Hasin, Matin, Malësinë e Madhe, Kurbinin, Korçën, Poliçanin dhe Gjirokastrën.
Aktualisht, vatrat aktive janë:
- Elbasan: Në vendgrumbullimin e mbetjeve, ku vijon puna për shuarjen e plotë të zjarrit. Gjatë ditës së djeshme është punuar me hedhjen e inerteve dhe kapsulimin e mbetjeve, ndërsa ekspertët kanë matur ndotjen e ajrit. Forcat operacionale do të vazhdojnë përpjekjet edhe sot.
- Finiq: Në zonën midis fshatit Grazhdan dhe Malçan, ku situata paraqitet më e qetë dhe intensiteti i zjarrit ka rënë. Monitorimi po bëhet nga distanca.
- Vlorë: Në vendin e quajtur “Sotiran”, ndërmjet fshatrave Tragjas dhe Dukat, një vatër zjarri në një sipërfaqe me shkurre. Efektivët vendorë po punojnë për shuarjen e flakëve.
- Tiranë: Në fshatin Bulticë, në një sipërfaqe me shkurre dhe ferra. Terreni i vështirë ka penguar ndërhyrjen me mjete zjarrfikëse, por sot do të vijojë puna me ndihmën e 40 forcave nga Forcat e Armatosura (FA).
- Has: Në zonën malore mes fshatrave Gjinaj dhe Domaj, në një sipërfaqe me pyll pishe. Terreni i vështirë dhe era po e favorizojnë përhapjen, ndaj puna për shuarjen vazhdon.
- Poliçan: Në fshatin Zgërbonjë, në një sipërfaqe me shkurre dhe ferra. Operacioni për shuarjen e zjarrit ka rifilluar në mëngjes.
Zjarret janë regjistruar kryesisht në sipërfaqe me shkurre dhe bimësi të ulët, duke djegur rreth 7 hektarë. Fatkeqësisht, në tre raste në Vorë, Tiranë dhe Korçë, zjarri ka përfshirë edhe banesa dhe një ndërtesë, duke shkaktuar dëme materiale.
Në operacionet e shuarjes kanë marrë pjesë 34 automjete zjarrfikëse, 399 forca operacionale dhe 53 mjete të rënda, si dhe kontributi i Forcave të Armatosura me 40 efektivë dhe mjete të tjera.
Sipas Institutit të Gjeoshkencave, sot priten reshje lokale të dobëta në disa qarqe. Sa i përket rrezikut nga zjarret, në shumicën e qarqeve pritet nivel “I LARTË”. Në Durrës, Korçë dhe Vlorë pritet nivel “I MODERUAR”, por lokalisht edhe “I LARTË” në zona të caktuara.
Ministria e Mbrojtjes u bën thirrje qytetarëve të tregojnë kujdes maksimal, të shmangin ndezjen e zjarreve dhe të njoftojnë menjëherë shërbimet përkatëse në çdo rast. Strukturat e mbrojtjes civile janë në gatishmëri të plotë për të ndjekur situatën në terren.
