Një ngjarje e dhunshme në rrugën “Ali Demi” të Tiranës, ku u përdorën shkopinj bejsbolli dhe pati të shtëna me armë në ajër, ka bërë të arrestohet një emër të njohur në qarqet mediatike si edhe operative, 28-vjeçari Njulend Palaj, i njohur edhe si Lendi Palaj, i portretizuar edhe si “truri i basteve” në kryeqytet.
Sipas policisë, ai u arrestua nga Policia e Tiranës pas disa ditësh në kërkim.
Sipas burimeve policore, Palaj u shpall në kërkim më 10 qershor 2024, pas caktimit nga Gjykata e Tiranës të masës së sigurisë “arrest në burg” për disa vepra penale të rënda: “Mbajtje pa leje dhe prodhim i armëve shpërthyese dhe municionit”, “Prodhim dhe mbajtje, blerje apo shitje pa leje e armëve të ftohta” dhe “Kanosja”, ndërsa po bëhen verifikime edhe për konfirmimin e të dhënave për çështjen e organizimit të basteve sportive.
Hetimet për konfliktin në “Ali Demi” nisën pas një sherri të dhunshëm mes disa të rinjve. Njëri nga pjesëmarrësit, 26-vjeçari G.K., u përpoq të devijonte hetimin me dëshmi kontradiktore dhe të pavërteta, duke tentuar të fshihte praninë e Palajt në vendngjarje.
Por përplasjet e tij me të vërtetën ndihmuan hetuesit të zbardhin më qartë rolin e Palajt dhe të çojnë në identifikimin e tij si një nga organizatorët e sherrit, i cili përfundoi me të shtëna me armë.
Lendi Palaj dhe bastet në Tiranë
Burime të ndryshme, përfshirë edhe ato të policisë, flasin për një tjetër pistë hetimi që rëndon mbi Palajn: dyshimet për organizimin dhe drejtimin e një rrjeti të basteve të paligjshme në Tiranë.
Ky aktivitet është i ndaluar me ligj në Shqipëri, por raportimet e mëhershme të Skyweb.al kanë zbërthyer funksionimin e këtij mekanizmi të paligjshëm, që operon përmes rrjeteve të mbyllura, klientëve të besuar dhe pagesave me para në dorë jashtë çdo sistemi formal financiar.
Në artikullin investigativ të publikuar nga Skyweb.al muaj më parë, është trajtuar mënyra se si funksionon ky zinxhir i basteve të jashtëligjshme./ SKYweb.al
