Është zbuluar identiteti i 26-vjeçarit shqiptar, i cili u vra me armë zjarri nga një biznesmen italian, pasi tentoi t’i vidhte banesën në bashkëpunim me dy bashkatdhetarë të tjerë.
Rivaldo Rusi, anëtar i bandës shqiptare që kishte tentuar vjedhjen në vilën në Centola, u gjet i groposur disa kilometra larg pronës së biznesmenit. Ndërkohë ende mbeten mister rrethanat e ngjarjes së rëndë, ku nga të shtënat me armë mbeti i plagosur rëndë një nga hajdutët shqiptar, ndërsa tjetri u arratis.
60-vjeçari qëlloi disa herë me një pushkë gjuetie duke vrarë Rivaldo Rusin, trupin e të cilit më pas e fshehu, si dhe plagosi rëndë një tjetër. Dinamika e shkëmbimit të zjarrit, kush qëlloi i pari dhe cila ishte sekuenca e të shtënave nuk dihen ende.
Gjithashtu është e paqartë nëse biznesmeni veproi vetëm apo u ndihmua nga dikush nëfshehjen e trupittë hajdutit të vrarë. Të dhënat e para mund të vijnë nga autopsia mbi trupin e 26-vjeçarit Rivaldo Rusi.
Hajduti tjetër i plagosur gjatë grabitjes nga 60-vjeçari, i cili ndodhet i shtruar në spital në gjendje të rëndë në spitalin Cardarelli në Napoli, u arrestua. Hetuesit kanë zbuluar se ai është me precedentë kriminal dhe ishte në arrati për vepra penale të kryera në Toskanë.
Kur gjendja e tij shëndetësore të përmirësohet, shqiptari do të merret në pyetje për të treguar versionin e tij të asaj që ndodhi mbrëmjen e së dielës në vilën e biznesmenit.
Ishte vetë sipërmarrësi, Aurelio Valiante, i cili zbuloi vendin ku e kishte fshehur trupin e Rivaldo Rusit.
Ai e gjeti veten të rrethuar në shtëpinë e tij nga rreth 50 shqiptarë nga provinca e Casertës, përfshirë të afërm dhe miq të të riut të vdekur dhe të plagosur, të cilët donin hakmarrje.
Biznesmeni u paraqit në Prokurori me avokatin e tij, Antonello Natale. Gjatë marrjes në pyetje, pranoi se e kishte qëlluar 26-vjeçarin me armë zjarri dhe më pas e kishte fshehur trupin e tij.
Aurelio Valiante, ndërsa hajduti tjetër qëndronte në tokë i plagosur rëndë, dyshohet se e transportoi trupin e shqiptarit me një fuçi vere, të vendosur në makinë.
Disa kilometra larg shtëpisë së tij, në një zonë të izoluar në fshatin San Severino di Centola, ai hapi një gropë dhe varrosi trupin e 26-vjeçarit.
Dhe pikërisht në vendin e treguar nga biznesmeni, policia gjeti trupin. Në ato momente në vendngjarje ndodheshin gruaja dhe vjehrra e viktimës.
“Ai bëri një gabim”, thanë ato, duke shtuar “Por nuk duhej të kishte vdekur kështu. U varros si kafshë. Na la një fëmijë pa baba.”
Sipërmarrësi tani po hetohet për vrasje, lëndime të rënda trupore dhe fshehje të një kufome.
Por situata mund të ndryshojë më tej kur dinamika e ngjarjes të bëhet e qartë.
Hetuesit duhet të përcaktojnë nëse hajdutët u goditën përpara, gjatë një përleshjeje apo ndërsa përpiqeshin të iknin.
