Drejtuesja e departamentit të Arsimit në Partinë Demokratike Lili Sula deklaroi sot dalja e tezave të provimeve kombëtare të maturës shtetërore të Gjuhës së Huaj dhe të Gjuhës Shqipe dhe të Letërsisë pas fillimit të provimit është dështim i sistemit arsimor.
Në një deklaratë për mediet Sula tha se “barazia e të gjithë nxënësve në provim garantohet me ligji dhe është shkelur rregullisht nga ministria, e cila nuk bën transparencë dhe nuk ndëshkon përgjegjësit për këtë skandal të radhës”.
Sipas Sulës “ministria e shndërron në normë dhe standard daljen e tezes”.
“Nuk ka shtet në rajon dhe në Europë që daljen e tezave të provimeve ta konsiderojë normale dhe të ndjehet krenar për ‘’përputhjen’’ mes rregullave të shkruar dhe zbatimit praktik”, tha Sula.
Sula tha se matura kombëtare edhe këtë vit “certifikoi mungesën e plotë të përgjegjësisë për rezultate në arsim, ripohoi gremisjen e thellë të sistemit, atë që ekspertët ndërkombëtarë e kanë theksuar prej vitesh, gremisje për të cilën ka punuar kjo parti shtet”.
