Mbrëmjen e djeshme, në zonën e Ali Demit, pranë një lokali dhe fare pranë rrugës kryesore, ndodhi një përplasje fizike e ndjekur nga të shtëna me armë. Ngjarja u raportua nga disa portale si një sherr mes të rinjve, pa dhënë emra dhe pa thelluar arsyet e konfliktit.
Sipas burimeve të Pamfletit nga Policia e Tiranës, pas kësaj përplasjeje qëndron shtetasi Lendi Palaj, një emër i përmendur më herët si drejtues i rrjetit të basteve informale “333” dhe “CR7”. Në kulmin e përplasjes, miku dhe krahu i tij i armatosur, Xhoi Çupi, ka nxjerrë armën dhe ka qëlluar në ajër, në drejtim të një automjeti tip Audi me targa britanike.
Janë sekuestruar dy gëzhoja pistolete, ndërsa policia ka marrë në pyetje disa persona, por nuk ka ende një reagim publik apo masë ndalimi për protagonistët. Ngjarja po kualifikohet “në heshtje” si incident i zakonshëm.
Xhoi Çupi, i cili njihet në terren si personi që Palaj përdor për mbrojtje dhe për mbledhje borxhesh bixhozi, është i njëjti që u përmend në plagosjen me armë në zonën e Shkozës në gusht 2023, ku mbeti i plagosur një i ri pas një përplasjeje për motive ende të paqarta.
Nuk është hera e parë që emri i Lendi Palajt del në konflikte të tilla. Në një tjetër episod, të ndodhur po në zonën e Ali Demit, përballë zyrave të PSD-së, ndodhi një tjetër përplasje fizike që përfshinte emra të njohur në terren, por që u mbyll me “paqësim” institucional.
Këto episode nuk janë më “sherre mes të rinjve”. Janë përplasje të organizuara, që zhvillohen në zona të populluara, me armë zjarri, ku palët vijnë me makina luksoze, me eskortë dhe me njerëz të armatosur në dispozicion.
Dhe për çfarë ndodhin këto?
Për borxhe bastesh? Për pazare të prishura? Apo për kontroll territori mes rrjeteve të paligjshme që operojnë në heshtje?
Askush s’pyet, askush s’ndërhyn. Por faktet janë aty: këta njerëz kanë krijuar rrjete dhune, ndikimi dhe mbrojtjeje, që përfshijnë edhe efektivë të Gardës së Republikës në funksione informale eskortash dhe sigurie personale për personazhe si Palaj.
/pamfleti
