Një tjetër skandal ka përfshirë Federatën Shqiptare të Futbollit, këtë herë lidhur me biletat e ndeshjes së fundit të Kombëtares. Pavarësisht interesimit të madh të tifozëve, stadiumi “Air Albania” nuk ishte plot.
Sipas të dhënave zyrtare të FSHF-së, janë shitur vetëm 20,400 bileta, ndërkohë që kapaciteti i plotë i stadiumit është 22,500 vende. Kjo do të thotë se mbi 2 mijë vende kanë mbetur bosh, në një ndeshje ku interesimi ishte maksimal.
Kjo diferencë ka ngritur dyshime të forta për mënyrën e shpërndarjes së biletave. Shumë tifozë kanë denoncuar pamundësinë për të gjetur bileta online, ndërkohë që stadiumi nuk ishte i mbushur.
Akuzat ndaj FSHF-së flasin për mbajtje të qëllimshme të biletave për njerëz të “privilegjuar”, apo edhe për shpërndarje jo-transparente. Në rrjetet sociale ka shpërthyer zemërimi i tifozëve, të cilët e quajnë këtë një dështim total dhe abuzim të pastër.
