NGA ETLEVA MERKO
Nga shumë këndvështrime, 1 Qershori është një ditë simbolike. Një ditë ku fëmijët festojnë, i urojmë duke i kujtuar se janë e ardhmja. Por përtej urimeve dhe tullumbaceve shumëngjyrëshe, e vërteta është se fëmijët në botë dhe në Shqipëri nuk jetojnë të gjithë të njëjtin realitet.
Ndërsa ne flasim për të drejtat e fëmijëve, në të njëjtën kohë:
Çdo ditë, mbi 9,000 fëmijë në botë humbin jetën nga mungesa e ushqimit, uji i pijshëm dhe kujdesi shëndetësor.
Më shumë se 400 milionë fëmijë jetojnë në zona të prekura nga konfliktet, ku lufta ua ka zëvendësuar lodrat me frikën, shkollën me strehën dhe sigurinë me pasiguri.
Vetëm në vitin 2023, mijëra fëmijë humbën jetën ose u plagosën nga luftërat në Gaza, Ukrainë, Jemen e më gjerë, shumica e tyre pa faj, pa zë, pa histori që të dëgjohet.
A nuk janë të drejtat e fëmijëve universale?
A nuk thotë Konventa për të Drejtat e Fëmijëve se çdo fëmijë meriton të jetojë, të mësojë dhe të rritet në paqe?
Le të kthehemi tek Shqipëria:
Premtime të mëdha dhe një realiteti komplet ndryshe.
Në Shqipëri, flasim shpesh për dashurinë për fëmijët, për prioritetin që u japim, për “kujdesin maksimal” nga institucionet. Por sa të vërteta janë këto fjalë, kur investimi në arsim është ndër më të ultat në rajon?
Vetëm 2.7% e PBB-së shkon për arsimin parauniversitar (nën mesataren e vendeve të Ballkanit dhe shumë larg vendeve të BE-së).
Shumë shkolla, sidomos në zonat rurale, nuk kanë infrastrukturë dhe kushtet bazike për një mësimdhënie normale.
Tekstet shkollore janë pa cilësi, shpesh të mbushura me gabime dhe pa vlerë edukative.
Kjo situatë nuk është vetëm mungesë prioriteti. Është një dështim i drejtpërdrejtë për të ndërtuar një të ardhme më të mirë për vendin. Fëmijët e sotëm janë qytetarët e së nesërmes. Nëse ne nuk investojmë në ta sot, nuk kemi të drejtë t’u kërkojmë llogari atyre nesër.
Gëzuar 1 Qershorin!
Me reflektim dhe vendosmërinë për të mos e reduktuar këtë ditë në një simbol që harrohet brenda 24 orëve.
Të kujdesesh për fëmijët nuk është luks. Është detyrim moral, ligjor dhe njerëzor.
E nëse ka një ditë për të thënë të vërtetën le të jetë kjo.
Le të mos heshtim më.
#1Qershori #FemijetJaneEArdhmja #TeDrejtatEFemijeve
#StopWarOnChildren #EveryChildMatters #PeaceForChildren
#ShqiperiaPerFemijet #ArsimCilesor #MosHesht #FëmijëriPaFrikë
