Kreu i Partisë Demokratike, Sali Berisha, ka dalë sot në një deklaratë për mediat pas paraqitjes së tij në ambientet e SPAK, në zbatim të masës së sigurisë “Detyrim paraqitje”.
Gjatë fjalës së tij, Berisha ka hedhur akuza të forta në drejtim të kreut të Prokurorisë së Posaçme, Altin Dumani, duke e cilësuar atë si bashkëpunëtor të një karteli të fuqishëm droge në Europë. Ish-kryeministri deklaroi se ka lënë një mesazh të drejtpërdrejtë për Dumanin në zyrën e tij, ku i referohet me epitetin “Altin Troplini”.
“Kjo zyrë shteti që paguhet me rrogat më të larta në Ballkan, 7 mijë euro për person, do të shpallet seksion i kartelit Troplini, më të fuqishëm të drogës në Europë, i vetmi që administron Portin e Durrësit. Ndaj dhe në shënimin që i lash Altin Troplinit, e informova se sot e tutje nga Dumani do ta quajmë Altin Troplini”, deklaroi Berisha.
Ai e justifikoi këtë akuzë me arsyetimin se Prokuroria e Posaçme kishte mbajtur për 22 ditë një vendim gjykate që, sipas tij, duhej të çonte në arrestimin e disa emrave të njohur, përfshirë Xhvdet Troplinin dhe Elvis Doçin.
Ndërkohë, po gjatë ditës së sotme, në Gjykatën e Posaçme Kundër Korrupsionit dhe Krimit të Organizuar (GJKKO) pritet të hidhet shorti për përzgjedhjen e trupës gjykuese që do të shqyrtojë çështjen “Partizani”. Vendimi për kalimin e dosjes në gjykim u mor më 19 maj, pas muajsh zvarritjeje proceduriale.
