Një operacion i përbashkët mes Italisë dhe Shqipërisë, çoi në goditjen e trafikut ndërkombëtar të drogës, e cila vinte nga Ekuadori, drejt Barit.
Në një konferencë të përbashkët me SPAK, Policinë e Shtetit, kryeprokurorin e Barit dhe drejtues të Antimafias italiane, prokurori i posaçëm Vladimir Mara, dha detaje nga sekuestrot që janë kryer në kuadër të operacionit “Ura”.
Mara tha për mediat se janë sekuestruar përkatësisht: 3 restorante në Durrës, 6 shoqëri tregtare, si edhe një televizion në Vlorë.
“Janë sekuestruar 3 restorante në Durrës, një bar kafe, 6 shoqëri tregtare dhe 1 televizion në qytetin e Vlorës”, tha Mara. “Gjatë këtij hetimi më parë janë sekuestruar 3 milionë euro, para cash, si të ardhura të këtij grupi kriminal, të cilat i janë nënshtruar hetimit të këtij procedimi penal”, deklaroi Mara.
Pjesë e skemës kriminale kanë qenë edhe uniformat blu, ku është lëshuar urdhër arrest ndaj 2 punonjësve të Policisë së Shtetit, njëri me post të rëndësishëm.
“Kemi pasur dy punonjës të policisë së shtetit, njëri në pozicion të rëndësishëm. Në njërin rast kemi pasur bashkëpunim dhe korrupsion në policinë e Portit të Durrësit. Sa i përket persona të cilët janë lëshuar masa sigurimi, janë kapur dhe organizatorë të këtij grupi”, tha Mara.
