Partia Aleanca Konservatore për Shqipërinë , e kryesuar nga z. Altin Goxhaj, ka depozituar një kërkesë zyrtare për informacion pranë Komisionerit të Komisionit Qendror të Zgjedhjeve, z. Ilirjan Celibashi, lidhur me mospublikimin e të dhënave mbi pjesëmarrjen e votuesve në zgjedhjet e 11 majit 2025.
Në kërkesën e dorëzuar më 14 maj, Goxhaj ngre shqetësimin se, pavarësisht përfundimit të procesit zgjedhor, në faqen zyrtare të KQZ-së nuk figurojnë ende të dhëna zyrtare mbi numrin e pjesëmarrësve në votime.
Sipas kryetarit Altin Goxhaj, çdo qendër votimi ka qenë e pajisur me pajisjen e identifikimit elektronik (PEI) dhe të gjitha Komisionet Zonale të Administrimit Zgjedhor (KZAZ) kanë paraqitur procesverbalet përkatëse. Po ashtu, ai thekson se KQZ, bazuar në ligj, ka detyrimin të përditësojë në mënyrë transparente të dhënat zgjedhore.
“Duke qenë se ka pretendime publike për manipulim të shifrave të pjesëmarrjes, mungesa e publikimit të tyre përforcon dyshimet dhe cënon besimin e publikut tek procesi,” thuhet ndër të tjera.
