Një moment i veçantë është regjistruar këtë të diel në një qendër votimi në Elbasan, ku mes qytetarëve që ushtronin të drejtën e votës, u shfaq edhe një nuse me fustanin e bardhë.
E vendosur për të mos e lënë pa shfrytëzuar të drejtën e saj si qytetare, ajo u paraqit në qendrën e votimit për të hedhur votën përpara se të niste ceremonia martesore.
Gjestin e saj e kanë përshëndetur të pranishmit dhe komisionerët, ndërsa pamjet u shpërndanë gjerësisht në rrjetet sociale si simbol i përkushtimit qytetar dhe të drejtës për të vendosur për të ardhmen.
Sot, më 11 maj 2025, qytetarët shqiptarë po votojnë për të zgjedhur 140 deputetët e legjislaturës së re. Janë rreth 3.7 milionë qytetarë me të drejtë vote, ndërsa për herë të parë në historinë e zgjedhjeve parlamentare në Shqipëri, është përfshirë edhe vota e diasporës, me mbi 245 mijë emigrantë të regjistruar për të votuar.
