Hetimet për vrasjen e 22-vjeçares shqiptare, Ilaria Sula, kanë zbuluar detaje të reja, pas deklaratave të autorit të dyshuar, ish-të dashurit të saj, Mark Samson.
Sipas mediave italiane, Samson ka ripërsëritur se pas vrasjes së Ilaria Sula në dhomën e tij të gjumit më 26 mars, ai e ka nxjerrë trupin e pajetë nga shtëpia dhe e ka ngarkuar vetë në makinë.
Por tani, ai përmend edhe një dëshmitar, një person që thuhet se e ka parë duke tërhequr valixhen që përmbante trupin e Ilaria Sulas.
Deklarata e tij ka ngritur pikëpyetje për hetuesit, pasi dëshmitari i përmendur ende nuk është gjetur.
“E ngarkova vetë valixhen në makinë, më ka parë edhe një person”, shkruan Samson në një letër që i është dorëzuar prokurorëve të Romës.
Sipas hetuesve, Samson ka gënjyer në mënyrë të përsëritur gjatë hetimeve.
Ai ka fshehur detaje të rëndësishme, si dështimin në studimet e tij dhe gënjeshtrat për rolin e nënës së tij, e cila dyshohet se e ka ndihmuar të pastrojë gjakun pas krimit.
Për më tepër, ai ka tentuar të devijojë hetimet duke përdorur telefonin e viktimës për të krijuar lëvizje të rreme dhe për të krijuar idenë se Ilaria ishte ende gjallë.
