Sapo kanë përfunduar ndeshjet e fundit për këtë sezon për Kategorinë e Parë dhe tashmë janë mësuar të gjitha verdiktet. Flamurtari ka fituar në transfertë 0-1 ndaj Vorës dhe tashmë siguron rikthimin direkt në Superiore pas 5 vitesh.
Vora nga ana tjetër e ka “prerë biletën” dy javë më parë për në Superiore. Besa fitoi në transfertë 0-3 ndaj Valbonës, por kavajasit do të provojnë shansin për t’u ngjitur në Superiore përmes play-offit.
Përveç Besës, tre ekipet e tjera që shkojnë në play-off janë Burreli, Pogradeci dhe Apolonia. Fituesi mes këtyre katër ekipeve do të përballet në “finalen” në fund me vendin e tetë në Superiore, ekipi që fiton do luajë në “elitë” sezonin e ri.
Kastrioti dhe Kukësi shkojnë në play-out ku do të kërkojnë të qëndrojnë ende në Kategorinë e Parë. Valbona dhe Erzeni prej kohësh dihet që do të luajnë sezonin e ri një nivel më poshtë, pra në Kategorinë e Dytë.
