Anuela Ristani, e cila mori drejtimin e Bashkisë së Tiranës pas arrestimit të Erion Veliajt, ka nisur një valë shkarkimesh. Me një lëvizje të shpejtë, ajo ka larguar disa nga njerëzit e besuar të Veliajt, duke u zëvendësuar me emra të mbështetur nga kryeministri Edi Rama.
Një nga ndryshimet më të rëndësishme ishte emërimi i Skerdi Drenovës në krye të Ujësjellës Kanalizime Tiranë (UKT) i cili më parë ka drejtuar Operatorin e Sistemit të Transmetimit (OST).
Deri në momentin e fundit, për këtë post konkurronte edhe Kujtim Nanaj, i cili gëzonte mbështetjen e Elton Kacidhes dhe të bashkëshortit të vetë Ristanit. Nanaj shpresonte të merrte drejtimin e UKT-së, por ndërhyrja e Ramës ndryshoi ekuilibrat, duke e lënë atë në postin e zëvendësdrejtorit.
Një tjetër lëvizje e bujshme ishte ajo e drejtorisë së koordinimit dhe bashkërendimit, ku në krye u vendos Eldi Hoxha, një emër i njohur në administratë, por aktualisht nën hetim nga SPAK për çështje të lidhura me doganat.
Me këto lëvizje, kontrolli i plotë mbi Bashkinë e Tiranës kalon nën orbitën e Edi Ramës, i cili tashmë e ka konsoliduar pushtetin në nivel vendor, duke shtrirë ndikimin e tij edhe në institucionet që deri tani ishin të lidhura me Veliajn.
Erion Veliaj më 18 mars ka firmosur nga qelia delegimin e detyrës së kryebashkiakut për Sara Goxhaj. Me këtë vendim të Veliajt u largua Anuela Ristani, të cilës Veliaj i delegoi detyrat pak ditë pas arrestimit.
“Znj, Sara Goxhaj, Nën/kryetar i Bashkisë Tiranë, të kryejë përkohësisht edhe detyrat e kryetarit të bashkisë Tiranë. Periudha e ushtrimit të kompetencave të deleguara, fillon më datë 19.03.2025, deri në një urdhër të dytë. Urdhri nr. 366, datë 14.02.2025 “Për delegimin e përkohshëm të detyrave të kryetarit të Bashkisë Tiranë”, shfuqizohet. Ngarkohet Sekretari i Përgjithshëm, Kabineti i Kryetarit, Drejtoria e Përgjithshme e Administrimit të Brendshëm, Drejtoria e Përgjithshme e Medias dhe Komunikimit për qytetarët për zbatimin e këtij urdhri”, thuhej në dokument.
Por më 20 mars, pasi lajmi u bë publik, përmes një statusi në rrjetet sociale Veliaj thotë se ridelegimi i kompetencave ishte i gabuar për shkak se kishte menduar që ekipi drejtues ishte dakordësuar më parë.
“U informova që paska plasur peshku në moçalet mediatike për përplasjen time me Ramën, për punë delegimesh. E para njëherë, me Ramën kam vetëm mall të takohem për të folur për punët si gjithmonë dhe asgjë tjetër s’më shkon në mendje.
E dyta, kam firmosur një ridelegim me idenë e gabuar se ishte dakordësuar brenda ekipit drejtues, por kështu është kur “punon” pa informacionin e mjaftueshëm.
E fundit, kërkoni e gërmoni ku të doni tani, se u bë sport ky falë edhe prokurorit tim të dashur, por në marrëdhënien time me Ramën lodheni kot fare fare, se është plazmuar në kohëra të vjetra dhe nuk e ndryshon dot asnjë kohë, sado e mallkuar qoftë. Delegimi është rikthyer aty ku ishte dhe këtu mbyllet edhe keqkuptimi”, shkruan Veliaj.
Pasi mori ridelegimin e detyrës nga Erion Veliaj, Anuela Ristani shkarkoi nënkryetaren Sara Goxhaj, të cilës kryebashkiaku i besoi përkohësisht firmën.
Ristani shkarkoi edhe sekretarin e Përgjithshëm, Alban Dokushi dhe komandoi në vend të tij, Jonida Halilin. /MASKA.AL
