Është zbardhur dëshmia e rojeve private të dhënë për autoritetet, në lidhje me sulmin e regjistruar rreth orës 02:30 të 25 Dhjetorit të vitit të kaluar, ku dy persona të maskuar u futën në zyrat e kompanisë telefonike “One Albania” në zonën e Laprakës në kryeqytet
Ngjarja u mbajt e fshehtë për rreth 3 muaj nga ana e kompanisë, teksa ditën e djeshme, Policia e Tiranës njoftoi se kishte vënë nën hetim 7 persona.
Burime për mediat bëjnë me dije se në deklaratën e dhënë para oficerëve të Komisariatit nr.3 në Tiranë, rojet private kanë thënë se janë detyruar që të mos tregonin, pasi nuk donin t’i prishnin reputacionin.
“Nuk donin t’i prishnim reputacionin kompanisë, prandaj nuk e denoncuam vjedhjen”, – kanë deklaruar përgjegjësit për ruajtjen e objektit.
Nga hetimet paraprake rezultoi se rreth orës 02:30 të datës 25 dhjetor, dy shtetas të maskuar kanë hyrë në ambientet e kësaj kompanie, duke dëmtuar drynin e derës së pasme.
Ngjarja është konstatuar nga punonjësi i sigurisë së brendshme i kësaj kompanie, shtetasi Gentian Koçi, i cili, në deklarimin e tij, ka pohuar se nuk janë marrë sende dhe nuk janë shkaktuar dëme materiale.
Punonjësi në fjalë nuk ka njoftuar organet ligjzbatuese, por dyshohet se ka njoftuar vetëm drejtuesin teknik dhe punonjësit e grupit të shoqërisë private të sigurisë fizike që kishte në ruajtje ambientet e kompanisë. Po ashtu, është konstatuar se edhe përfaqësues të kompanisë telefonike kanë qenë në dijeni të ngjarjes, por nuk e kanë kallëzuar atë në organet kompetente.
Sulmi ka ndodhur në bjë kohë kur SPAK po heton Erion Veliaj dhe familjarët e tij, si dhe marrëdhëniet mes kompanisë “One Communication” dhe “Gogel”, e cila drejtohet nga Arbër Veliaj. Në qendër të hetimeve janë dyshimet për favorizime apo ushtrim të ndikimit të paligjshëm nga ana e Veliajt për të siguruar kontrata.
Ende mbetet mister se çfarë kanë bërë dy personat e maskuar brenda zyrave të “One Albania” dhe cili ka qenë qëllimi i tyre.
Në kuadër të hetimeve, janë proceduar penalisht punonjësit e sigurisë:
Erald Sina, me detyrë Drejtues Departamenti i Zyrave dhe Pasurisë në kompaninë ONE.
Gentian Koçi, punonjës i sigurise fizike kompania ONE.
Arsil Feshti, detyrë punonjës sigurie i brendshem kompania One.
Alfred Zylalaj, me detyrë drejtues Teknik i Kompanisë Nazeri 2000.
Gëzim Sala, punonjës sherbimi SHPSF Nazeri 2000.
Koço Veneti
Myzafer Dinoshi, punonjës shërbimi SHPSF Nazeri 2000
Ismet Tartari, punonjës shërbimi SHPSF Nazeri 2000.
