Gjykata Themelore në Prishtinë ka dënuar Florent Poroshticën, një nga të akuzuarit për krijimin dhe menaxhimin e grupit famëkeq “Albkings”, me 21 muaj burgim dhe 5 mijë euro gjobë.
Ndërkohë, rasti i Edin Nevzatit, ish-administrator i grupit, është veçuar, pasi ai ka ikur në Serbi dhe nuk është paraqitur në seancë.
Gjyqtari i rastit, Adnan Kamberi, ka njoftuar se do të ndërmerren masa për të sjellë Nevzatin para drejtësisë. Seanca, e caktuar për 30 janar 2024, u shtye pasi Nevzati njoftoi avokatin në momentin e fundit se nuk do të ishte prezent, ndërsa më pas është konstatuar se ai ka ikur në një fshat të Serbisë.
Grupi “Albkings” është përfshirë në vjedhjen e identiteteve dhe kredencialeve të shumë individëve, përfshirë Anisa Veselin, ish-banorja e Big Brother VIP Kosova 3.
Prokuroria ka ngritur aktakuzë ndaj F.P., E.N. dhe E.S., të akuzuar për vjedhje identiteti, shantazh dhe shtrëngim. Të akuzuarit kanë arritur marrëveshje me Prokurorinë për pranim fajësie.
