Ish-kryeministri italian, Matteo Renzi ka vizituar sot kampin e Gjadrit, duke kritikuar ashpër qeverinë e Giorgia Melonit, se ka shpërdoruar 1 miliardë euro.
“S’ka të bëjë me kahet politike, unë shoh numrat. Qeveria italiane humbi gati 1 miliardë euro, këto nuk janë paratë e demokratëve të majtëve të djathtëve, por të italianeve, të buxhetit të shtetit”, tha Renzi për mediat.
Nga Renzi erdhi një propozim për shfrytëzimin e kampeve në Gjadër e Shëngjin që edhe pse u ndërtuan për refugjatët, sot janë bosh. Ish-kryeministri propozoi që në këto kampe të shndërrohen në burgje për shqiptarët e dënuar në Itali.
“Do ishte më e udhës që këtë qendra të shndërroheshin në burgje për të bërë të mundur që shqiptarët që janë dënuar në Itali të kenë mundësi të jenë më afër familjes së tyre. Ajo që thuhet në Itali, është vetëm propagandë. Është propagandë e Giorgia Melonit, ajo është në influencere shumë e mirë”, tha ai.
Ish-kryeministri italian tha se Shqipëria ka mundësi të bëhet pjesë e Bashkimit Europian, por një mesazh i tillë, sipas tij, mund të dëmtojë procesin e integrimit të vendit në BE.
“Ua kam thënë edhe miqve italianë, që të vendosen këtu të burgosurit shqiptarë. E kemi artikuluar dhe ne mediat shqiptare dhe Itali, Meloni ka thënë “po, pse jo”. Me kaq para në Itali mund të bëhen qindra qendra të tilla, pse nuk u ndërtuan në Itali, cili ishte motive. Shqipëria do të hyjë në BE, por ky është një mesazh që e largon Shqipërinë nga BE”, përfundoi Renzi.
