Kryeministri Edi Rama ka ripërsëritur edhe njëherë refrenin se SPAK po godet sot socialistët, sepse ishte ai që i dorëzoi shpatën e drejtësisë.
Duke e shitur si një fitore ‘të projektuar’ nga vetë ai dhe PS, Rama shprehet se socialistët kanë bërë të pamendueshmen, duke i dhënë sipas tij, mundësinë SPAK të godasë zyrtarë e ish-zyrtarë.
Nga ana tjetër, Rama i referohet edhe deklaratave të kryedemokratit Sali Berisha, i cili garantoi se me ardhjen e PD në pushtet SPAK do të shkrihet.
Rama: Unë jam shumë krenar dhe ne socialistët jemi shumë krenarë që bëmë të pamendueshmen. Dorëzimin e shpatës së drejtësisë në duart e drejtësisë. Nga kjo zyrë ku ka qëndruar shpata e drejtësisë, që në vitin 1912… dhe ia kemi dorëzuar drejtësisë. Sot ka një lëvizje të paimagjinueshme deri dje të drejtësië në hetimin dhe ndëshkimin e personave të lidhur me pushtetin politik.
Përtej të metave, boshllëqeve dhe lajthitjeve të institucioneve të reja të drejtësisë, ky është moment historik. Por që të garantojmë sigurinë para ligjit, kjo nuk mund të jetë vetëm në dorë të një partie sepse nesër vjen dikush tjetër dhe e përmbys. Prandaj duhet BE, sepse BE e bën të pamundur që një apo disa forca të kthejnë shpatën në zyrën e të parit të partisë.
Pikërisht për këtë, të gjithë ata që si njerëz të degraduar rrinë dhe përsërisin çdo ditë “kush e ka rradhën, bugu burgu”, do t’ia japim përgjigjen më 11 maj. Ata janë armiqtë e reformës në drejtësi. Luli ishte kukulla e bufit të kënetës. Dhe bufi i kënetës e thotë shumë qartë që me votën e 11 majit do shkrij SPAK-. Ky kërcënim mund të vijojë edhe në të ardhmen nëse ne nuk jemi pjesë e BE-së.
