“Koalicioni Euroatlantik” i Lulzim Bashës dorëzoi listat e kandidatëve për deputet që do të garojnë në zgjedhjet parlamentare të 11 majit. Në përpjekje për të mbushur listat, Basha ka tërhequr ‘pa dashje’ edhe anëtarë që nuk janë pjesë e Euroatlantikëve të tij.
Këtë e deklaron Sabire Hoxhaj, që rezulton të jetë përfshirë në listat e Euroatlantikëve të Bashës, si kandidate për deputete në Fier.
Përmes një reagimi në Facebook, Sabire Hoxhaj shprehet se nuk është pjesë e Euroatlantikëve, por prej vitesh mbështet Partinë Demokratike dhe është anëtare pranë strukturave të saj. Hoxhaj shkruan se nuk ka plotësuar asnjë formular për të qenë kandidate e ndonjë partie të sapokrijuar.
Edhe Luan Baçi, kandidat për deputet i PD në Fier, ka bërë një reagim lidhur me rastin e Sabire Hoxhajt. Baçi shkruan se Hoxhaj është një demokrate e nderuar prej vitesh dhe se “euroatlantikët e shitur” kanë dashur të përdorin emrin e saj për të penguar PD-në në fitoren e 11 majit.
“SABIRE HOXHAJ nje zonje fisnike, perfaqsuese e denje e Mallakastres, mesuese e shkelqyer, demokrate e nderuar, drejtuese e strukturave te larta te partia demokratike ne Mallakaster, ish kryetare komune ne Mallakaster, perfaqsuese e partise demokratike, kontribuese dhe faktor i rendesiahem ne proçesin e rithemelimit te partise demokratike, me kryetar profesor, doktor Sali Berishen!
Euroatlantiket qesharak dhe te shitur, duan te perdorin emrin e saj te nderuar ne listat e tyre te turpit, per te penguar demokratet dhe partine demokratike ne fitoren e sigurt te 11 Majit!
Hiqni dore nga keto veprime te turpshme, boll abuzuat dhe luajtet me demokratet, do te mbaheni mend si njerezit me qesharak, qe kane ekzistuar ndonjehere!”, shkruan Baçi në Facebook.
