Një ditë pasi përjashtoi deputetët me një mandat nga listat e sigurta, kryeministri Edi Rama ka folur sërish për zgjedhjet e 11 majit.
Në komunikimin “Sy m’sy” që Rama zhvilloi me ndjekësit në Facebook, u ndal tek zgjedhjet parlamentare. Kreu i socialistëve tha se PS do të ketë një skuadër të vjetër në eksperiencë, por me energji të reja.
Rama la të kuptohet se emra të vjetër të PS do të angazhohen me zgjedhësit në terren.
Edi Rama ka folur për skuadrën që do shkojë në zgjedhjet e 11 majit, e që sipas tij do të jetë një bashkim i eksperiencës dhe energjisë së re.
“Skuadër perfekte nuk ka, por një skuadër shumë të mirë do ta keni, skuadër të ripërtërirë, do harmonizohet eksperienca me energjinë e të rinjve, një skuadër që do garantojë pavazhdimësinë procesit të BE, që do të ketë dijen e nevojshme të brendshme se për çfarë bëhet fjalë, dhe që do garantojë një përfaqësim të lidhur me egzigjencat e lidhur me kohën. Do jetë skuadra me e vjetër në eksperiencë dhe me e reja në energji.
Dje bëmë të qartë vijën parimore të ndarjes së detyrave, kush ka qoftë dhe një mandat do jetë në fushëbetejë për të marrë vota për veten dhe PS, burrat nuk diskutohen, por dhe për gratë dhe vajzat. Në listën e mbyllur do të jenë njerëz që hyjnë për herë të parë në parlament, që vijnë nga kontribute të caktuara në shoqëri etj”, tha Rama.
