Më 11 janar do të nisë procesi i regjistrimit të emigrantëve për zgjedhjet parlamentare të vitit 2025.
Këtë e njoftoi kreu i Komisionit Qendror të Zgjedhjeve, Ilirjan Celibashi, në nënkomisionin e Kuvendit për Emigracionin dhe Diasporën.
Celibashi kërkoi që partitë politike të bashkëpunojnë me qëllim që të realizohet në kohë regjistrimi.
“Dua të konfirmoj se Procesi i përgatitjes të votimit nga jashtë ka shkuar në përputhje me parashikimet e kodit zgjedhur, përfshi këtu edhe në kuptim të afateve që ky kod ka përcaktuar për aspekte të ndryshme të karakterit normativ apo organizativ të votimit nga jashtë. Komisioni rregullator në KQZ ka miratuar të gjitha aktet kryesore normuese me qëllim realizimin e votimit nga jashtë. Kemi miratuar aktin që ka të bëjë me regjistrimin, me përgatitjen e listës së zgjedhësve, kemi miratuar aktin që ka të bëjë me vërtetimin e adresës së votuesit nga jashtë. Kemi miratuar rregullat për procedurën e votimit nga jashtë. Jemi drejt finalizimit të ndërtimit të platformës së regjistrimit. Besoj që para krishtlindjeve do të kemi një demonstrim të funksionaliteteve të këtij sistemi me qëllim që më 11 janar kjo platformë të jetë funksionale dhe të fillojë procesi i regjistrimit të votuesve nga jashtë”, tha Celibashi.
Sa i takon tarifës së shërbimit postar, Celibashi tha se ka patur diskutime me qeverinë shqiptarë.
“PS i kemi sugjeruar që për këtë proces së parë, kostot të paguhen nga shtetit shqiptar dhe duket se e kemi vullnetin e qeverisë dhe të Kuvendit, sepse në ligjin për buxhetin i është vënë në dispozicion KQZ buxhet për të paguar tarifën si në dërgim edhe në kthim të fletës së votimit”, tha kreu i KQZ.
