Autoritetet policore italiane të Firences kanë arrestuar një 41-vjeçar shqiptar, i cili akuzohet se ka dhunuar dhe torturuar për një kohë të vazhdueshme të dashurën e tij.
Mediat përtej Adriatikut raportojnë se shqiptari e kishte rrahur partneren e tij pas një debati mes tyre dhe më pas e kishte lidhur me litar në shtrat, në mënyrë që të mos dilte nga shtëpia gjatë kohësh që ai nuk ndodhej aty.
Vajza ka rrëfyer atë që ka ndodhur, duke saktësuar se në të kaluarën, gjatë vitit të fundit, ka pasur episode të tjera agresioni, të shkaktuara nga xhelozia e burrit.
Gjatë kontrollit në shtëpinë e të dyshuarit është gjetur një litar, konkretisht në gardërobë, ku dyshohet se është i njëjti me të cilin lidhej vajza, duke dëshmuar për atë që ndodhi atë ditë.
Pas të gjitha hetimeve, shqiptari është vënë në pranga për abuzim familjar dhe rrëmbim. Mësohet se me urdhër të Prokurorisë Publike të Firences, ai është transferuar në burgun Sollicciano të Firences, ku do të presë seancën e vlefshmërisë dhe gjykimin e mëpasshëm.
