Banorët e ish komunales në Tiranë kanë mbajtur këtë të hënë protestën e radhës në Bashkinë Tiranë pasi janë lënë në qiell të hapur prej shumë kohësh ndonëse u është premtuar ndryshe.
Zvarritja dhe injorimi nga Bashkia Tiranë prej disa muajsh, banorët e ndërtesës s ëish komunales kanë tubuar përpara ambienteve të bashkisë në një protestë simbolike të organizuar më 8 prill, datë që përcaktohet si dita ndërkombëtare e romëve.
Për 7 muaj, rreth 40 familje nuk kanë marrë asnjë ndihmë, as bonusin e qirasë, as rindërtimin e premtuar nga autoritetet lokale, ndërsa kryebashkiaku i Tiranës, Erion Veliaj, është akuzuar për mungesë përgjegjësie. Njëra prej protestuesve, një grua e cila është edhe kryefamiljare e tre fëmijëve, u ka bërë thirrje Ramës dhe Veliajt për të mbajtur premtimin e tyre për të siguruar strehim për të gjithë ata që janë prekur nga tërmeti.
“Erion Veliaj dhe Edi Rama na kanë ardhur tek socialja dhe na kanë premtuar se do na japin shtëpi. Ku është premtimi? Ne kemi 7 muaj pa bonus, ju lutem të dalin dhe të na sqarojnë. Kemi ardhur dhe njëherë tjetër dhe nuk na kanë bërë asgjë edhe këtë radhë nuk e di. Erion Veliaj dil dhe na sqaro, kaq duam!!”- tha ajo.
Banorët e prekur nga situata e vështirë janë të vendosur të vazhdojnë protestat derisa të marrin një zgjidhje nga autoritetet lokale, duke theksuar se janë lënë në mëshirën e fatit dhe janë harruar nga bashkia.
