Pasditen e së premtes është ekzekutuar në fshatin Larushk të Fushë-Krujës, Gentian Bejtja, ish-punonjës i policisë së burgjeve, i cili i kishte shpëtuar 3 atentateve të mëparshme.
Bejtja është ekzekutuar brenda rrethimit të banesës, ndërsa dyshimet e para kanë të bëjnë me faktin se viktima ose është tradhëtuar nga persona që kanë pasur dijeni për lëvizjet e tij, ose autorët e dyshuar të krimit apo ndihmës të tyre, kanë mbajtur nën survejim për një kohë të gjatë 42-vjeçarin. Ky i fundit dyshohet se për muaj me rradhë është fshehur në zonën e Lezhës, nga ku mendohet se një ditë më parë ka lëvizur drejt banesës së tij në Larushk.
Në vendin e ngjarjes policia ka gjetur 50 gëzhoja, që i përkasin armëve automatike që u shkrehën ndaj Bejtjas, ndërsa dyshohet se në krim kanë marrë pjesë 4 persona.
Ndaj Bejtjas është qëlluar me 3 armë automatike, nga 3 persona, që dyshohet se ishin të maskuar dhe me veshje të zeza, të cilët kanë zbritur nga automjeti tip Land Rover, që më pas u dogj, duke qëlluar me breshëri. Viktima ka tentuar të largohet drejt një fushe, por pa mundur t’i shpëtojë atentatit të katërt ndaj tij.
Sipas raportimeve, porta kryesore e banesës së Bejtjas ka qenë e hapur dhe një gjë e tillë iu ka mundësuar autorëve të futen direkt në oborr.
Bejtja dyshohet se ka qenë pak metra larg nga oborri, ka qenë në pjesën e pasme të shtëpisë kur është qëlluar me breshëri
Autorët pasi kanë qëlluar në drejtim të viktimës kanë lëvizur në drejtim të fshatit Hasan dhe kanë djegur makinën.
Dyshohet se autorët janë pritur nga një tjetër mjet i cili i ka larguar nga zona.
Gentian Bejtja, ish-polic dhe eksponent i njohur i botës së krimit, është ekzekutuar pasditen e të premtes, të 15 marsit, në banesën e tij. Një atentat i mirëorganziuar i mori jetën ish-policit të Burgjeve, ndaj të cilit u derdhën breshëri plumbash kallashnikovi.
Tre herë u shpëtoi atentateve, por armiqtë duket se e kishin mbajtur në survejim dhe kanë vepruar kur Bejtja arriti në shtëpinë në Fushë Krujë. Pas 8 muajsh në kërkim nga policia, ai shkoi dje në banesë ku e priste nëna e vetme, por gjeti vdekjen. Ndaj tij është qëlluar me 4 kallashnikovë, teksa ka qenë në serë. Bejtja ishte në kërkim për t’u marrë në pyetje lidhur me atentatin që u bë ndaj tij më korrik 2023.
Gentian Bejtja u ka shpëtuar tre atentateve më parë. Në korrik 2023, i zunë pritë bashkë me dy fëmijët dhe kunatin, Ramazan Sino, i cili humbi jetën.
Bejtja ishte një person i njohur për policinë, me precedentë në fushën e veprave penale kundër personit dhe pronës.
