Lulzim Basha, i cili ka marrë drejtimin e asaj që njihet si PD e vulës, akuzoi opozitën e drejtuar nga Sali Berisha se bën pazare natën me Edi Ramën për të mos hapur sipas tij, listat e zgjedhjeve.
“Teatri i reformës zgjedhore me ndihmën edhe të regjisorit të kësaj shfaqje, Edi Ramës ka marrë dimensione qesharake kësaj jave. A keni dëgjuar këtë javë ndonjë pyetje drejtuar aktorëve politikë nëse janë pro listave të hapura, nëse janë për votim elektronik, nëse janë për një zonë elektorale dhe të thuash që ky debat nuk ka ndodhur gjithë këtë javë, është një koincidencë.
Në 24 orë të bësh xhiron e medias diskutohet për gjithçka përjashtuar këto çështje. Përpjekja për të na hequr nga këto çështje diku me tym dhe pasqyra dhe diku me shfaqje si ajo e paradites, nuk do të na kthejë pas. Listat e hapura, barazia e votës, pra Shqipëria një zonë elektorale.
Një deputet në Vlorë zgjidhet me 8500 vota, në Kukës me 13 mijë vota. Mënyra për ta zgjidhur është Shqipëria një zonë elektorale dhe kjo i jep fund debatit se ku do të votojë diaspora, siç e ka Kosova apo Holanda. Javët do të kalojnë dhe pastaj do të thotë Edi Rama s’kemi kohë.
Ai tha se këta aksionistë që i hakërrehen deputetes Flutura Açka, pse nuk bllokuan Konferencën e Kryetarëve? “Shikoni si sillen me Damian Gjiknurin dhe shikoni si u sollën me Açkën? Aksionistët ia bënë qokën sot Elisës dhe Damianit, sepse do të shkojnë bashkë në SHBA te mëngjesi i lutjeve”, tha Basha.
