Të gjithë e mbajmë mend kalimin e Eros Grezdës te Rejnxhërs në vitin 2020 për shifrën e plot 2 milionë eurove.
Por në klubin skocez gjakovari nuk arriti të lërë shenjë. Mediat skoceze e kanë rikthyer edhe një herë Grezdën në kujtesë, duke e etiketuar si një lojtar, që la vetëm shenja për probleme disiplinore. “The Scottish Sun” kthehet të shkruajë për Grezdën, ku nënvizon se më së shumti gjakovari mbahet mend për një gjobë të vendosur nga ish-trajneri Steven Gerrard.
“Djali i keq i Rejnxhërs, që u gjobit në trafik dhe për pështymë ndaj kundërshtarit, tani është i papunë”, shkruan media skoceze, që duket sikur ka ende “mllef” me gjakovarin. Në kohën kur luante me Rejnxhers, Grezda mori një gjobë të majme për shkak se pështyu një kundërshtar në një miqësore mes Rejnxhers B dhe Irlandës së Veriut.
Gjithashtu, ai pati një ndëshkim shembullor edhe për shkak të mungesës së dokumentacionit të makinës. Një tjetër moment i nxehtë për Grezdën ishte në Kroaci tek Osijek, ku ai u përlesh me njërin prej kundërshtarëve të tij në tunel. Media skoceze shkruan se Grezda ka ndërruar disa klube dhe se tashmë është i martuar dhe me fëmijë. Pavarësisht kësaj, në Shqipëri gjakovari mbahet mend edhe për kohët e tij në Kombëtare dhe periudhën e artë.
